"Олмалиқ" клубида етакчилик қилиб келган ҳужумчи Мўйдин Мамазулунов янги мавсумни "Шўртан"да бошлайдиган бўлди. Иқтидорли ҳужумчи ўтган йилги чемпионатда ўзининг тўпурарлик қобиляптини яна бир бор намойиш этди ва бу сафар 16та гол билан тўпурарлар орасида иккинчи бўлди. Табиийки, уни қўлга киритишни кўплаб жамоалар исташганди. Бироқ Мамазулуновнинг "Олмалиқ" билан яна бир йиллик шартномаси бор эди. Шунга қарамай "Шўртан" бу ҳужумчини ўз сафига қўшиб олишга қатъий киришди ва охир-оқибат олмалиқликлардан унинг траснферини сотиб олишга муваффақ бўлди. Шундай қилиб келажаги порлоқ футболчи сифатида эътироф этилаётган фарғоналик ҳужумчи "Шўртан" аъзосига айланди. Аслида у билан анчадан бери суҳбатлашишни ният қилиб юргандик. Боз устига футболчи Эронга ҳам бориб келди. Кейин "Шўртан" аъзосига айланди.
"РАҚОБАТДАН ЧЎЧИГАНИМДА БУ ЕРГА КЕЛМАСДИМ"
- Мўйдин, авваламбор "Шўртан" жамоаснинг аъзосига айланганингиз билан табриклайман.
- Раҳмат, катта!
- Ғузорликлар сафига ўтишингиз қандай юз берди?
- "Шўртан" клубига ўтишимми? Нима десам экан? (бироз ўйланиб) Мен "Олмалиқ" машғулотларида қатнашиб тургандим. Қолаверса, "Олмалиқ" билан яна бир йиллик шартномам ҳам бор эди. "Шўртан" раҳбарияти эса Игор Шквиринга мурожаат қилиб менинг трансферимни сотиб олишмоқчи эканлигини айтишган. Шундан сўнг иккала томон келишган ҳолда мен "Шўртан" клубига кўчиб ўтдим.
- Демак, сиз ҳам бу таклифга қаршилик билдирмасдан рози бўлгансиз-а?
- Ҳа, рози бўлдим.
- Бунгача Эронга ҳам бориб келдингиз...
- Ҳа, мен Али Даи бошчилик қилаётган жамоага бордим. Лекин у ерда кўп вақт бўлганим йўқ. Тўғри, Али Даи билан гаплашдим-у, лекин қандайдир тушунмовчиликлар бўлди. Тўғриси, бу ҳақида гапиришни истамайман.
- "Шўртан"нинг машғулотларида иштирок этишни бошлаб юбордингиз. Ҳозирча янги клубингиздан олаётган таассуротлар қандай? Ҳис-ҳаяжон босилгандир-а!
- Ҳаяжонланадиган ёшдан ўтганман. Жамоа билан икки маҳалдан шуғулланяпмиз. Бу ерда ҳамма нарса бор, шароитлар бекаму-кўст яратилган. Янги мураббий келган ва машғулотларни ажойиб тарзда ўтказяпти. "Шўртан"даги кўплаб ўйинчиларни танийман. Шу боис жамоада ўзимни худди аввалдан ўйнаб юргандек қулай ҳис қиляпман.
- Янги жамоага ўтгач бош мураббий билан ўзаро мулоқотда бўлдингизми?
- Игор Николаевич билан ҳали бафуржча гаплашганим йўқ. Лекин машғулотлар давомида менга ўзининг кўрсатмаларини бермоқда. Менимча хотиржам гаплашиш учун вақт топилади.
- Кўпчилик "Шўртан"нинг янги мураббий ҳақида жуда илиқ фикрларни айтишмоқда...
- Менда яхши таассурот қолдиряпти. Криушенконинг машғулот ўтказиш жараёни ёқимли. У барча ўйинчилар билан дўстона муносабатда бўлади. Шу боис муомаласига гап йўқ.
- "Олмалиқ"да етакчи ҳужумчи эдингиз. "Шўртан"да эса вазият сал бошқачароқ. У ерда тажрибали ҳужумчилар бир нечта ва етакчилар ҳам шунга яраша мавжуд. Табиийки, рақобат ҳам ўз-ўзидан кучли эканлигини айтишим шарт эмас...
- Рақобатдан қўрққанимда "Шўртан"га келмасдим. Ҳужумда Игор Таран биланми ёки бошқаси биланми менга фарқи йўқ, ўйнайвераман. Ўзимга тўлиқ ишонганим учун бу жамоага келдим. Бу ёғи энди ўзимга боғлиқ, қанча кўп меҳнат қилиб, ҳаракат қилсам асосий таркибдан жой оламан деб умид қиламан.
- Айтмоқчиманки, "Олмалиқ"даги етакчилик қобилятингизни "Шўртан"да ҳам намойиш этишга ишончингиз комилми?
- Худо хоҳласа, ишончим комил. Бунинг учун қўлимдан келганича курашаман. "Шўртан" мен илиқ кутиб олди ва Икром ака Норчаев билан гаплашиб олдим. Ҳозирча ҳаммаси жойида.
"ЎТГАН ЙИЛГИ МАВСУМДАН ҚОНИҚДИМ"
- 2011 йилги чемпионатда 25 марта майдонга тушиб 16 бор гол уришга эришдингиз. Лекин яққол тўпурар бўлиш учун озгина омад етишмади холос. Умуман, ўтган мавсумдан қониқдингизми?
- Якунланган чемпионатдан қониқдим. Шунинг учун омадли мавсум деб айта оламан. 25та учрашувда 16та гол урдим ва бу менинг бир мавсумда энг кўп тўп киритганим билан ёдда қоларлидир. 2009 йили 12та гол урган бўлсам, 2010 йилда 10та тўп киритгандим. Ўтган йили эса деярли барча ўйинларда майдонга тушиб ўзимни кўрсатишга ҳаракат қилдим. Бунинг натижасида эса кўпроқ гол урдим. Шу боис чемпионатдан қониқиш ҳосилқ илдим.
- Кўриниб турибдики, "Олмалиқ"даги уч йиллик фаолиятингиз мобайнида асосан тўпурарлик қобилятингизни намойиш эта олдингиз. Бунинг замирида нима ётибди?
- Аввало айтишим керакки. бу жамоавий ўйин. Футболчилар билан яхши муносабатда бўлганим, мураббийнинг менга ишончи, ўзим устимда кўп ишлашим ва омадим туфайли ҳам шунча гол урдим деб ўйлайман. Энг муҳими, "Олмалиқ"да муҳит яхши эди. 2012 йилда ҳам "Шўртан"да шундай ниятларим бор.
- Олмалиққа биринчи лига вакили - "О.Акбаров" жамоасидан келганингиз ёдимда. Ўтган вақт давомида эса олий лигада ўзингизга яраша мавқега эга бўлдингиз ва ҳурмат ҳам қозондингиз. Буларга қандай эришяпсиз?
- Билсангиз керак, "О.Акбаров"да ўйнаб юрган пайтимда 23та гол уриб биринчи лига тўпурари бўлганман. Ундан олдин "Цементчи"да тўп сурардим. Аммо у қадар кўп гол урмасдим. Менинг ном қозонишим асосан 2008 йилдан бошланди. Ўша йилги мавсум тугагач Игор Шквирин мени "Олмалиқ"қа таклиф қилган. Биринчи лигада тўпурар бўлганимдан кейин ўз олдимга қачондир олий лигада ҳам тўпурар бўламан деб мақсад қўйганман. Ҳозирча тўлиқ бўлмаса-да, ниятларимга эришяпман. Бундан кейин ҳам изланишда ва мақсадимга эришишда давом этаман.
- Бизда иқтидорли ва савияли ҳужумчилар кўп. Лекин ҳаммаси ҳам кўп гол уравермайди. Сиз эса олий лигада ўйнаётганингиздан бери 10тадан ортиқ гол уряпсиз. Бу албатта ҳужумчининг олдига қўйган вазифаларидан бири саналади. Айтингчи, айни пайтда ушалмаган орзуингиз нима?
- Бу йил "Шўртан" либосида тўп сурман. Шу боис 2012 йил жамоам учун ҳам, ўзим учун ҳам омадли бўлишини тилайман. Шу ўринда жамоа янги мавсумда 3-ўрин учун курашишни ўз олдига мақсад қилиб қўйган. Бу йўлда мен бор кучимни сарфлашга тайёрман. Умуман айтганда, олий лигада совриндорлар қаторидан жой олиш, Ўзбекистон Кубогини қўлга киритиш, Осиё майдонларида муваффақиятли иштирок этиш ва терма жамоа сафида ўйнашдек орзуларим бор. Буларнинг барчасига "Шўртан" орқали эришмоқчиман.
- Мўйдин, шу даражага етиб келишингизда Игор Шквириннинг меҳнати катта эканлигини кўпчилик яхши билади...
- Ҳа, Игор Анатольевич менга барча ёрдамни кўрсатди. Бу мураббий гарчи биринчи лигада ўйнаган бўлсам-да, менга ишонч билдириб ўз клубига таклиф қилди ва олий лигадаги дебют мавсумимдаёқ 10тадан ортиқ учрашувларда асосий таркибда майдой таркшдим. Ҳар қандай мураббий ҳам биринчи лигадан келган ўйинчига дарҳол ишонч билдиравермайди. Шквирин эса менга бошидан бошлаб ишонди ва унинг ишончини оқлашга ҳаракат қилдим. Шу боис бу мутахассиснинг ҳиссаси жуда катта.
"ШЎРТАН"ГА ЎТГАНИМДАН 200 ФОИЗ ХУРСАНДМАН"
- Ҳар қандай футболчи биринчи лигада ўйнаётганида олий лигада тўп суришни ният қилади. Кейин элитага чиқиб ўйнашни бошлаганида ўша футболчининг кайфияти кўтарилади ва хурсандчилигининг чеки йўқ бўлади. Табиийки, бу ҳолат сизда ҳам бўлган. Айтмоқчиманки, "Олмалиқ"дан "Шўртан"га ўтганингизда ҳам хурсандчилигингиз қай даражада бўлди?
- Бирични лигадан "Олмалиқ"қа ўтганимда ўзимга яраша қувонгандим. Чунки ўз олдига яхши мақсадларни қўйган жамоа сафига ўтгандим ва мен бу билан бир поғона олдинга қадам ташлагандим. Ўша пайтда роса хурсанд бўлганим ёдимда. Энди бўлса "Олмалиқ"дан "Шўртан"га ўтганим учун 200 фоиз хурсандман десам янглишмайман.
- Демак, "Шўртан"га кўчиб ўтишингизни ҳам олдинга ташланган яна бир қадам десак бўлади, шундайми?
- Бу билан олдинга бир қадам ташладим. "Олмалиқ" чемпионатимизнинг ўртамиёна жамоаси бўлса-да, ўз олдига қўядиган ўзига яраша мақсадлари бор. "Шўртан"нинг эса ўзига яраша катта мақсадлари бор. Табиийки, шунга яраша ўзимнинг ҳам мақсадларим бор. Бирор-бир клубда тўп сураётган футболчи албатта бунданда кучлироқ жамоада ўйнашни мақсад қилади. Шу сабабли буни мен тақдир тақозоси деб ҳисобламайман, шунчаки "Шўртан"га ўтиб бир поғона кўтарилдим.
- Ўртамиёна клубда ўйнаб голга чанқоқлигингизни исботлай олдингиз. Энди бўлса "Шўртан"га ўтдингиз ва кўпчилик сиздан кўплаб голларни кутишяпти. Боз устига бу ерда маҳоратли ижрочилар ҳам мавжуд. Шу боис янги клубинда тўпурарликка эришиш учун имкониятим янада ошди деб ҳисоблайсизми?
- Албатта. "Олмалиқ" ва "Шўртан"нинг футболчилари бошқа-бошқа. Ғузорликлар ўз олдига катта мақсадларни қўйишаётгани учун бу ердаги футболчиларнинг тажрибаси юқорироқ. "Олмалиқ"да эса аксарият ўйинчилар ёшлардан иборат. "Шўртан"да яхши савиядаги легионерлар ҳам бор. Ҳужумчини ҳужумчи қиладиган бу ярим ҳимоячилардир. Ўйлайманки, "Шўртан"да ҳам тўпурарлик анаънани давом эттираман.
- Ҳар қандай футболчининг янги жамоасига киришиб кетиши осон бўлмайди. Бу борада сизга кимдир ёрдам беряптими?
- Жамоадаги футболчиларни биламан ва улар билан гаплашганман. Масалан, етакчи ўйинчи Асрор Алиқулов билан қалин бўлмасам-да, кўп кўришиб турардим. "Қизилқум"дан келган Обид Жўрабоев билан ҳам яхши муносабатдаман. Ильнур Хазигалиев билан ҳам кўча-куйда учрашиб қолсак албатта салом-алик қилиб турардик. Умуман, жамоадагилар билан бегона эмасдим. Аста-секин машғулотлар давомида барча йигитлар билан муносабатимни янада яхшилаб оляпман.
- Эшитган бўлсангиз "Шўртан" чилилик ҳужумчи Хосе Луис Вильянуэвани ҳам таклиф этиш пайида юрибди. Мабодо у ҳам келадиган бўлса, ҳужумда Вильянуэва билан тандем ҳосил қилиш сизга қанчалик қизиқ туюлади?
- Қандай ҳужумчи бўлишидан қатъий назар мен ўша билан яхши ўйнашга ҳаракат қиламан. У чилилик бўладими, ўзбек бўладими бунинг менга фарқи йўқ. Агар ҳаммаси кўнгилдагидек бўлса бу албатта жамоа ўйинига ҳам ижобий таъсир кўрсатади.
- Аслини олганда ҳужум чизиғида қайси футболчи билан бирга ўйнашни истайсиз?
- "Шўртан"дами?
- Мен умумий маънода айтяпман.
- Ҳали бу ҳақида ўйламагандим. Тўғриси, ажойиб савол бўлгани учун бошимни "қотириб" қўйдингиз. Ўзбекистонда яхши ҳужумчилар кўп. Ёшлигимда "Нефтчи" ўинбосарларида бир йил ўйнаганман. Ўша кезларда Умид Исоқовга, Игор Буровга ҳавас қилардим. Қанийди, ўшалар билан бирга тўп сурсам дердим. Вақт ўтган сари уларнинг ёши ўтиб борди ва ёшларга жой бўшатдилар. "Олмалиқ"да эса Носир Отақўзиев билан ҳам бирга тўп сурдим. Мен бу ҳужумчи билан ҳам яхши тандемни яратгандик. Тўғриси, бу мен учун кутилмаган савол бўлди. Ўйламаган саволни берганингиз учун нима дейишни ҳам билмай қолдим.
"НЕФТЧИ"ДА ЎЙНАШНИНГ МЕНГА ҚИЗИҒИ ЙЎҚ"
- Асли фарғоналиксиз. Табиийки, у ерда маҳаллий ёш иқтидорлар ҳар доим етишиб чиқади. Уларнинг аксарияти эса Юрий Саркисяннинг эътиборидан четда қолмайди ва "Нефтчи"га қабул қилинади. Аммо сиз бошқа жамоаларда ўзингизни кўрсатиб келяпсиз. Фарғонада ҳам мана шундай ўйин намойиш қилиш истагингиз борми?
- "Нефтчи"да 2003 йили ўринбосарлар таркибида тўп сургандим. У пайтда анча ёш эдим. Ўша кезларда Юрий Саркисяннинг қўли остида ўйнашни ният қилардим. "Нефтчи" ҳам ўзига яраша кучли эди. Ҳозир эса авлодлар алмашинуви юз бергани боис жамоа аввалгидек кучга эга эмасдек кўринмоқда. Бироқ мураббий менга ишонч билдирмаган ва "Цементчи"га ижарага бериб юборган. Қувасойда ўзимни кўрсатиш учун роса ҳаракат қилдим. Кейинчалик эса "О.Акбаров"га ўтдим. Ҳамманинг ризқи турли хил жойларда бўлади. Қолаверса, олдингдан оққан сувнинг қадри йўқ деб бежизга айтишмайди.
- Рости, шу пайтгача "Нефтчи"дан таклиф тушишини кутганмисиз?
- "Нефтчи"дан таклиф бўлишин кутмаганман. Ўзи улар мени чақиришмаган ҳам. Агар бундай вазият бўлган тақдирда ҳам 50+50 баҳолардим.
- Демак, "Нефтчи"да ўйнай олмаётганингиз бу сиз учун ҳеч қандай армон ёки афсусланарли эмас, тўғрими?
- Бунинг менга умуман қизиғи йўқ. Мени бошқа клубларда ҳамма нарса қониқтиряпти.
- "Олмалиқ"да ўтказган уч йиллик фаолиятингиз давомида унутилмас ўйин сифатида қайси учрашувни айтган бўлардингиз?
- 2009 йили ўз майдонимизда "Пахтакор"ни қабул қилиб 1:0 ҳисобида ғалаба қозонганмиз...
- ... ҳа, ўша ўйиннинг сўнгги сонияларида Баҳтиёр Ҳамидуллаевнинг тўп узатишидан сўнг сиз ҳал қилувчи тўпни киритгандингиз.
- Тўғри, Ҳамидуллаев менга ажойиб пас узатган ва ўшанда гол урмасам бўлмасди. 93-дақиқадги ягона гол туфайли биз 1:0 ҳисобида ютгандик. Ушбу беллашув ҳеч қачон эсимдан чиқмаса керак.
- Янги мавсумдан нимани кутяпсиз?
- "Шўртан" билан совриндорлар қаторидан жой эгаллаб Осиё чемпионлар Лигасида иштирок этишни орзу қиляпман. Шунга яраша олдимизга қўйилган вазифани бажариш учун курашишимиз лозим. Мен эса жамоадошларим билан яхши тил топишиб, мураббийлар ишончини қозонган ҳолда жамоага ёрдам бергим келяпти.
- Ўйлашимча "Шўртан" билан кейинги мавсумларда халқаро майдонларда иштирок этиш сизга қизиқ туюляпти!
- Ҳа, бунга ҳаракат қиляпмиз.
- Балки, ғузорликлар таркибига қўшилишингиз сиз учун терма жамоа йўлини очиб берар?
- Бўлиши мумкин. "Шўртан"да ҳар томонлама ўзимни кўрсатишим керак. Агар шундай бўлган тақдир Вадим Абрамов мени ҳам терма жамоага жалб қилишига ишонаман. Агар менга ҳам имконият берса бунинг учун жон-жаҳдим билан ҳаракат қилардим.
- Дарвоқе, ўтган йили терма жамоамиз жаҳон чемпионати саралаш доирасида Тожикистон билан куч синашди. Ўшанда сизнинг тожиклар сафида тўп суришингиз борасида гап-сўзлар пайдо бўлганди.
- Менга бу борада тожиклардан ҳеч ким алоқага чиқмаган. Бу хабарни фақат интернетда кўрганман. Балки, уларда шундай гап-сўз бўлгандир.
- Миллатингиз нима?
- Миллатим ўзбек!
Шуҳратбек ЖЎРАЕВ суҳбатлашди.
