"Насаф"да фаолият олиб бориб, ушбу мавсумда "Заря"га қайтган дарвозабон Дмитро Казаченко украиналик ҳамкасбларимизга интервью  берди.

- Дмитрий, "Заря"га ўтишингиз қандай содир бўлди?
- Агентларим мен билан Луганск шаҳри жамоаси қизиқаётганини айтишди. ШУндан сўнг менга шахсан Юрий Николаевич (Вернидуб - муаллиф) қўнғироқ қилди ва биз гаплашиб олдик.

- Таклиф устида узоқ бош қотирдингизми?
- Бирданига қарор қабул қилдим. "Заря" мен учун жонажон клуб ҳисобланади ва унинг сафига қўшилиш ёқимли.

- ОФК кубогини қўлга киритган жамоа сафида Премьер-лига аутсайдери таркибига қўшилишингиз осон бўлмагандир?
- Такрорлайман, "Заря"га нисбатан менинг меҳрим баланд. Шунинг учун клуб қандай ўринни эгаллаб турганининг менга фарқи йўқ. Бундан ташқари мусобақа жадвалининг қуйи қисмида туриш - бу вақтинчалик ҳолат.

- Сизни қаерга жойлаштиришди?
- Йиғинларга жўнаб кетиш олдидан мен бир неча кун меҳмонхонада яшадим. Туркиядан қайтиб келганимиздан кейин бу масалага тўхталамиз. Шундан сўнг Луганскка оиламни ҳам олиб келсам бўлади.

- Сизни қандай қабул қилишди?
- Хурсандчилик билан. "Заря"да аҳил жамоа йиғилган. Муҳит ҳам ажойиб. Клубда ёшлар кўп. Эски танишлардан эса Никита Каменюк ва Илья Галюзни айтиб ўтишим мумкин. Лекин тез орада барча йигитлар билан чиқишиб кетаман.

- "Заря"нинг муҳим фигураларидан бири бўзлган Шуховцевнинг ўрнини боса оламан деб ўйлайсизми?
- Албатта, Игорнинг ўрнини босишга ва унинг йўқлигини билинтирмасликка ҳаракат қиламан. Дарвозани қўриқлаш учун қўлимдан келган барча ишни амалга ошираман. Лекин шошмаймиз - бу ҳақда баҳорда яна гаплашамиз.

- Хорижда ўйнаганингизда Украина чемпионатини кузатиб бордингизми?
- Ҳа, Премьер-лига ўйинлари трансляцияси ва шарҳини интернет орқали кузатиб бордим. Янгиликларни ҳам футбол сайтлари орқали ўқиб бордим. Шунинг учун якунланган мавсум ҳақида кўп нарсани биламан дея айта оламан. Украина чемпионати савияси йилдан-йилга ошиб бораётгани кўриниб турибди.

- Келаси йили яна хорижда ўйнашингиз мумкинми?
- Профессионал футболчининг ҳаёти шунақа. Бугун бу ерда бўлсанг, эртага бошқа жойда ўйнашинг мумкин. Австралияда ўйнаётган Евгений Левченко эса футболчи учун чегера йўқлигини исботлади. Шунга қарамай, "Заря"да узоқ вақт қолишни истардим. Балки фаолиятимнинг охиригача бу клубда қоларман. Қолганини вақт кўрсатади.