Осиё Чемпионлар лигаси Элит мусобақасининг 4-туридан ўрин олган учрашувда “Пахтакор” ўз майдонида Саудия Арабистонининг “Ан-Наср” жамоасига 2:6 ҳисобида мағлуб бўлди.
Учрашувни фаол бошлаган “Пахтакор” 10-дақиқада бурчак зарбасини амалга оширди, аммо стандарт вазиятдан унумли фойдалана олмади. 11-дақиқада Чинеду ҳисобни очишга яқин келди. Унинг хавфли зарбасини рақиб дарвозабони қайтарди.
14-дақиқада Собирхўжаев ҳам қулай вазиятга чиқиб бораётган эди, бироқ сўнгги паллада “Ан-Наср” ҳимоячиси тўпни олиб қўйди.
15-дақиқада меҳмонлар ҳисобни очишди. Ал-Ҳамдан жамоасини олдинга олиб чиқди — 0:1. Орадан икки дақиқа ўтиб, “Пахтакор” ҳимоясидаги қўпол хатодан фойдаланган “Ан-Наср” иккинчи голни ҳам киритди — 0:2.
26-дақиқада Мозговой рақиб дарвозасини ишғол этди. Бироқ ҳакамлар VAR ёрдамида вазиятни текшириб, офсайд сабабли голни бекор қилишди.
32-дақиқада Жоау Фелиш яна бир бор “Пахтакор” дарвозасини ишғол этиб, ҳисобни йириклаштирди — 0:3.
Шунга қарамай, “шерлар” таслим бўлишмади. 36-дақиқада Насруллаев қанотдан тўпни жарима майдончасига узатди. Фламарион эса чап оёқда аниқ зарба йўллаб, ҳисобдаги фарқни қисқартирди — 1:3.
Иккинчи бўлимни “Пахтакор” ҳисобдаги фарқни қисқартириш умидида бошлади. Бироқ 53-дақиқада “Ан-Наср” яна гол уриб, устунлигини мустаҳкамлади — 1:4.
58-дақиқада тошкентликлар хавфли ҳужум ташкил этишди, аммо вазият гол билан якунланмади.
62-дақиқада меҳмонлар яна бир бор қарши ҳужумда тошкентликларни жазолашди — 1:5. Шу тариқа, саудияликлар ҳисобдаги устунликни янада оширишди.
75-дақиқада “Пахтакор” жавоб голини киритди. Ҳамдамов рақиб дарвозабони устидан тўпни ошириб ташлаб, чиройли гол муаллифига айланди — 2:5.
Бироқ 79-дақиқада “Ан-Наср” яна бир гол уриб, ҳисобни 2:6 кўринишига келтирди.
88-дақиқада Ибрагимов дарвоза томон зарба йўллади, аммо тўп нишонга аниқ бориб тушмади.
Шу тариқа, “Пахтакор” Осиё Чемпионлар лигаси Элит мусобақасининг 4-турида ўз майдонида “Ан-Наср”га 2:6 ҳисобида мағлуб бўлди.
Элит ОЧЛ. Ғарб минтақаси, 4-тур
“Пахтакор” — “Ан-Наср” — 2:6
Голлар: Фламарион (36), Ҳамдамов (75) — Ал-Ҳамдан (15), Жоау Фелиш (17, 32), Аббдуллоҳ ал-Амрий (53), Абдулраҳмон Ғариб (62), Анхело (79).
“Пахтакор”: Назаров, Каримов, Абдумажидов, Таҳсин, Насруллаев, Бўриев, Мозговой, Собирхўжаев, Фламарион, Ресан, Чинеду.
“Ан-Наср”: Бенту, Наваф, Амри, Мартинез, Аман, Яҳё, Саму, Анжело, Фелиш, Мане, Ал-Ҳамдан.
