Мадриднинг «Реал» клуби собиқ яримҳимоячиси Хосе Мария Гути профессионал футболчилик фаолиятини якунлаганини расман маълум қилди.

«Қарор қабул қилиб бўлинди. Менга бир қатор таклифлар келиб тушди, аммо барибир охирида фаолиятимни якунлашга қарор қилдим. Энди оиламга кўпроқ вақт ажратишни хоҳлайман».

«Албатта, мен мураббий ёки спорт директори бўлиб ишлашни хоҳлайман. Балки ёшлар мураббийи бўларман. Масалан «Реал»да Бу менинг орзуим», дея Гутидан иқтибос келтиради «Marca» нашри.

Эслатиб ўтамиз, футболчининг сўнгги клуби Туркиянинг «Бешиктош»и бўлиб, у ердан Гути 2011 йилнинг октябрида кетганди. Шундан буён таклифлар бўлишига қарамай, у клуб танламай келаётганди.

Қўшимча қилиб ўтиш жоиз, Гути Мадриднинг «Реал» клуби сафида 5 маротаба Испания чемпионлигини қўлга киритган. Тўрт маротаба Испания суперкубоги ва шунингдек уч маротаба Европа чемпионлар Лигасида ғалаба қозонган.