Мадриднинг «Реал» клуби собиқ бош директори Хорхе Вальдано "Барселона" етакчиси Лионель Месси ҳақида суратга олинажак фильмда сценарист сифатида иштирок этади ва у бунда ҳеч қандай муаммо кўрмаяпти.
"Албатта, "Реал"га боғланган инсоннинг ушбу лойиҳада иштирок этишга розилик бергани ғалати туюлади. Лекин унутмаслик керакки, биз иккаламиз ҳам аргентиналикмиз. Боз устига, мен футболни яхши кўраман. Футболни яхши кўрадиган одам эса Мессини яхши кўрмасдан иложи йўқ.
Фильм сценарийсини ёзиш жараёнида менга ўғлим ёрдам беради. Унинг касби ҳам сценарист. Бу жуда улкан лойиҳа ва унда кўп инсонлар иштирок этишади", дея Вальданонинг сўзларидан иқтибос келтирмоқда Sport.es.
Лионель Месси Испания чемпионатининг ушбу мавсумида 16та ўйинда 11та голга муаллифлик қилган. Шунингдек, унинг ҳисобида 7та голли пас ҳам мавжуд.