Ўзбекистон кубоги нимчорак финалида "Пахтакор" ва "Қўқон-1912" клублари ўртасида жавоб учрашувидан сўнг (4:0) тошентликлар устози Самвел Бабаян фикрларини билдирди.

 - Ўйинда жамоалар савияси фарқи билиниб қолди. Йигитлар имкониятлардан фойдаланиб, ҳисобни йирик кўринишга келтиришди. “Қўқон-1912” жамоаси менда яхши таассурот қолдирди. Футболчилар қўрқмасдан ўйнашди. Бу мураббийнинг кўрсатмаси ва ўйинга ишлаб чиққан тактикаси бўлса керак. Болтабоев асосий таркибда дебют қилди ва чакки ҳаракат қилмади. Асосий таркибга кириш учун даъвогар эканлигини намойиш этди. Машарипов ҳам машғулотларда ёмон кўринмаяпти. Унинг келажаги порлоқ бўлишига ишонаман.

Футболчилардан рақибга ҳурмат билан муносабатда бўлишларини сўрадим. Жаҳонда кўплаб натижаларни кузатганмиз, қуйи лига вакили юқори дивизион грандини доғда қолдирган. Охирги мисол “Спартак” – “Тосно” учрашуви бўлганди.

Кейинги беллашувда “Насаф” билан ўйнаймиз. Бу кучли жамоа. Қаршиликларга билан баҳсга имкон қадар яхши формада етиб боришга интиламиз. Терма жамоага чақирув олган футболчилар билан муаммо бўлмайди деб ўйлайман. Ўйинчилар ўзларини терма жамоада кўрсатишлари лозим.