O‘tgan mavsumni «Buxoro» klubida o‘tkazgan tajribali yarim himoyachi Aziz Ibragimov faoliyatini Eron chempionatida davom ettiradigan bo‘ldi.
Aniqrog‘i, 2016 yilgi chempionat bahslarida 10ta gol urib, «Buxoro» to‘purariga aylangan futbolchi yaqinda Tabriz shahrining «Mashinasozi» klubida tibbiy ko‘rikdan o‘tib, jamoa bilan shartnoma imzoladi. Ma’lumot o‘rnida aytish joiz, mazkur klub ayni paytda Eron pro-ligasida 19-turdan so‘ng 10 ochko bilan 16-o‘rinni egallab turibdi. Jamoa oldiga kuchlilar safidagi o‘rnini saqlab qolish vazifasi qo‘yilgan. Bizga ma’lumki, Aziz Ibragimov faoliyati davomida «Traktor», «Sho‘rtan», «Mash’al», «Slovan» (Slovakiya), «Bogemians 1905» (CHexiya), «Sindao Jonun» (Xitoy), «Banik Most» (CHexiya), «Cheske Budeyovise» (CHexiya), «Bogemians» (CHexiya), «Andijon», «Dinamo» va «Buxoro» klublarida to‘p surgan. Demak, «Mashinasozi» - yarim himoyachi uchun faoliyatidagi 13-jamoa bo‘ladi. Biz futbolchi hayotidagi o‘zgarishlar tafsilotini yaxshiroq bilish maqsadida Ibragimov bilan bog‘landik.
- Aziz, eshitishimizcha, faoliyatingizni Eronda davom ettiradigan bo‘libsiz. Aytingchi, «Buxoro» klubi bilan tuzgan shartnomangiz yakuniga yetganmidi?
- Ha, «Buxoro» bilan kelishuvimiz yakunlangan edi. Bu - jamoadan ketishimning birinchi sababi edi. Tanganing ikkinchi tomonida esa manfaatli sharoitlar turgandi. Ya’ni, eronliklar taklifi shunday ediki, unga rad javobini bera olmasdim. Shu o‘rinda «Buxoro» klubi rahbariyati, murabbiylar va jamoa muxlislariga ulkan minnatdorchilik bildiraman. Ayniqsa, buxorolik ishqibozlarga alohida salom yo‘llayman. Ular har bir uy uchrashuvida stadionni to‘ldirib o‘tirishdi, astoydil qo‘llab-quvvatlashdi. Shu bois, Buxoroda o‘tgan bir yarim yil mobaynida futboldan faqat rohatlandim. Eng muhimi, klubdan ochiq yuz va yaxshi kayfiyatda ketish nasib qildi. Fursatdan foydalanib, yangi futbol mavsumida «Buxoro»ga omad tilayman.
- «Mashinasozi» varianti qanday paydo bo‘ldi?
- Do‘stim va agentim Farrux Sayfullayev Eron klubidan qiziqish bo‘layotganini aytdi. Shundan so‘ng jamoa bilan yaqindan tanishib chiqib, taklifga rozilik berdim.
- Yangi jamoada ko‘rikdan o‘tdingizmi?
- Albatta, Eronga yetib borishim bilan tibbiy ko‘rikdan o‘tdim. Natijalar ijobiy bo‘ldi va shundan keyingina ikki tomonlama kelishuvni imzoladik.
- Kelishuv qancha muddatga mo‘ljallangan? Klubda sizdan boshqa legionerlar ham bormi?
- Biz besh oylik shartnomaga qo‘l qo‘ydim. Klubda mendan tashqari, Gruziya va braziliyalik legionerlar ham bor.
- Yangi klubga moslashish jarayoni qanday boryapti? Til masalasida qiynalmayapsizmi?
- Ochig‘ini aytsam, «Mashinasozi» bilan hali yaqindan tanishib ulgurmadim. Ammo hozirdanoq aytishim mumkinki, til masalasida unchalik katta muammolar yuzaga kelmaydi.
- Tabrizda sizga yaratib berilgan sharoitlar qanday? Shahar mamlakat poytaxti Tehronga yaqinmi?
- Menimcha, samolyot Tehrondan Tabrizgacha bir soat parvoz qiladi. Sharoitlarga kelsak, hozircha mehmonxonada yashab turibman. Murabbiyimiz mahalliy mutaxassis ekan. U bilan ingliz tilida gaplashyapmiz.
- Ma’lumki, Eron futboli yakkakurashlarga asoslangan. Bunday futbolda jarohat olish ehtimoli yuqori bo‘ladi. Siz bunga tayyormisiz?
- Xabaringiz bor, «kontaktli futbol» menga begona emas. Chunki Chexiya va Slovakiya klublari safida o‘ynagan kezlarim xuddi shunday futbol hayotida yashaganman. Ochig‘ini aytsam, kurashlarga boy futbol shaxsan menga yoqadi.
- Aziz, «Buxoro» klubi rahbarlarining o‘tgan mavsum uchun futbolchilardan, xususan, sizdan qarzi bormi?
- Ha, klubning shaxsan mendan qarzi bor. Buni inkor etmayman. O‘ylashimcha, oliy ligamizda qarzdorlikdan xoli jamoalar juda kam bo‘lsa kerak. Chunonchi, boshqa jamoalardagi futbolchi og‘aynilarim bilan suhbatlashganimda, ular ham shu fikrni aytishadi.
- Hoynahoy, «Mashinasozi» oldiga pro-ligada qolish vazifasi qo‘-yilgandir-a?
- Xuddi shunday. Hozirda jamoamiz turnir jadvalining quyi pog‘onalarida bormoqda. Bu yil qanday qilib bo‘lmasin, Pro ligada jon saqlab qolib, kelasi mavsumda yuqori o‘rinlar uchun kurash olib borilishi rejalashtirgan.
- Nima deb o‘ylaysiz, vazifasini uddalay olarmikansizlar?
- Menimcha, uddalasa bo‘ladi, ammo bu oson emas. Turnir jadvalining quyi pog‘onalarida borayotgan klublar saviya jihatidan bir-biriga juda ham yaqin. Hammasi tayyorgarlik jarayoniga bog‘liq. Har qanday holatda ham, «Mashinasozi» mavsum yakunida o‘z obro‘sini saqlab qolishi uchun muvaffaqiyatlariga o‘z hissamni qo‘shib, legioner nomini oqlashga astoydil harakat qilaman.
- Qaror qabul qilish chog‘ida Eronda tajriba oshirgan do‘stlaringiz bilan maslahatlashdingizmi?
- Yo‘q, bu masalada hech kim bilan suhbatlashmadim. Negaki, faoliyatimda qanday ishga qo‘l urmayin, doimo ota-onam bilan maslahatlashaman. Ularning roziliklari va duolari bilan ish ko‘raman. Eron klubidan taklif bo‘lganda ham, avvalo ular bilan maslahatlashdim.
