“Mash’al” va “Nasaf” jamoalari o‘rtasidagi uchrashuv yakunlangach har ikkala jamoalar murabbiylari o‘yin haqidagi fikrlarini bildirishdi. Dastlab qarshiliklar ustozi Ro‘ziqul Sa’dullayevich o‘yin haqida quyidagi fikrlarni aytib o‘tdi.

— “Mash’al” biz uchun juda noqulay raqib hisoblanadi, agar o‘zaro uchrashuvlar tarixiga nazar tashlasak, Muborakda bungacha o‘n ikki yil muqaddam g‘alabaga erishgan ekanmiz. Bu juda katta vaqt. Hozirgi paytda jamoamizning holati ancha yaxshi, keyingi o‘yinlarni ko‘tarinki ruhda o‘tkazayapmiz. Bu ham bugungi g‘alabamizga omil bo‘ldi. Bugun shuningdek omadimiz ham keldi. Hisob 1:2 bo‘lib turgan paytda Humoyun Murtazoyev hisobni tenglashtirishi ham mumkin edi. Ammo undan omad yuz ugirdi. O‘ylaymanki, bugungi o‘yinimiz mazmunliroq bo‘ldi. Shuni evaziga ham qozondik.

Albatta, so‘nggi daqiqalarda hisob yirikroq bo‘lishi mumkin edi. Ammo bu vaziyatlardan biz foydalana olmadik.

Shaxzod Shaymanov haqida? Ushbu o‘yinchining darvozamizga gol urish xohish istagi yuqoriroq shekilli, mana uch yildirki Muborakdagi o‘zaro uchrashuvlarda darvozamizga gol urayapti. Ajoyib o‘yinchi", - dedi Ro‘ziqul Berdiyev.