Bugun “Markaziy” stadionimizda bo‘ladigan turning markaziy uchrashuvida jamoamiz “Paxtakor” bilan kuch sinashadi. Bugungi uchrashuv kumush medal sohibini aniqlab berishi mumkin. “Markaziy”da futbol ishqibozlari bugun ana shunday ahamiyatga molik futbol bahsining guvohi bo‘lishadi.
O‘zPFL 29-tur
“Nasaf” (Qarshi) - “Paxtakor” (Toshkent)
19.11.2017. “Markaziy” stadion. 14:00da
Bosh hakam: Zokirjon Qodirov (Navoiy)
Qanot hakamlari: Obid Jumayev (Navoiy), Ruslan Samandarov (Navoiy)
Zaxira hakami: Shuhrat Rajabov (Buxoro).
Nazoratchi: Alisher Abdullayev (Toshkent)
O‘zPFL vakili: Bobur Haydarov.
Qarshida o‘tkazilgan o‘zaro bahslarda “Nasaf” ustunlik qilmoqda. Qarshida bu jamoalar shu paytgacha 20 marta chempionat uchrashuvlarida tuqnash kelishgan. Shularning 7tasida “Nasaf” g‘alaba qozongan, “Paxtakor” esa 6 marta g‘alabaga erishgan, qolgan 7 uchrashuvda murosa ko‘chasi tanlangan. Qarshidagi uchrashuvlarda darvozalarga jami 37ta to‘p kiritilgan. To‘plar nisbati bo‘yicha ustunlik “Nasaf” tomonida 20:17. “Paxtakor” so‘nggi bor Qarshida 2015 yili g‘alaba qozongan – 0:1. “Ajdarlar” o‘tgan yilgi Qarshidagi o‘zaro bahsda “sherlar”ni 2:1 hisobida mag‘lub etgan.
Biz ishonamizki, bugun ham “ajdarlar” o‘z maydonida nimalarga qodirligini namoyish qilishadi va ko‘pmingsonli muxlislarini xursand qiladi. Bunga shubha yo‘q.
“Nasaf” chempionatning keyingi o‘n uchrashuvida ketma-ket g‘alaba qozondi. “Paxtakor”ning g‘alabali seriyasi beshtaga teng. Ushbu o‘nta uchrashuvda, futbolchilarimiz raqiblari darvozasiga 27ta to‘p kiritishdi. O‘z darvozasidan esa atigi 1ta to‘p o‘tkazib yubordi. Bugungi uchrashuvga futbolchilarimiz har qachongidan yaxshi tayyorgarlik ko‘rishdi. Yigitlarimiz faqat hakam hushtagini kutishmoqda va maydonda javlon urishga tayyorlar.
Bo‘lajak uchrashuv jamoamiz ustozi Ro‘ziqul Berdiyev uchun ham juda muhim, Sa’dullayevich bosh murabbiy sifatida bugun o‘z shogirdlarini 150-uchrashuvda maydonga boshlab tushadi. “Ajdarlar” bugun bu murabbiy qo‘l ostida ikkinchi marta kumush medallarni qo‘lga kiritishga yaqin. Berdiyev uchun bosh murabbiy sifatida, ilk kumush medali bo‘ladi.
“Nasaf” o‘z tarixida, oliy ligadagi 350-g‘alabasini nishonlash arafasida turibdi.
Aytingchi, shunday uchrashuvni “Markaziy”da ko‘rmay bo‘ladimi? Yo‘q deysizmi? Unda “Markaziy”ga, markaziy uchrashuvga marhamat qiling.
