Dortmundning «Borussiya» klubi hujumchisi Pyer-Emerik Obameyang qishki transfer oynasi yopilgunga qadar, katta ehtimol bilan, «Arsenal»ga o‘tadi.

BBC tarqatgan xabarga ko‘ra, London jamoasi gabonlik futbolchi uchun 60 million funt to‘laydi. "Kanonirlar" uchun bu summa rekord transfer hisoblanadi.

Germaniyaliklar Obameyangning o‘rniga boshqa nomzod topganlaridan keyin hujumchining "Arsenal"ga o‘tishiga rozilik berishadi. Bu nomzod Olivye Jiru bo‘ladimi yoki yo‘qmi, hozircha noma’lum. Avvalroq «Borussiya» Jiruni 1,5 mln yevro evaziga ijaraga olishi mumkinligi haqida xabar tarqatilgandi.

Kicker tarqatgan xabarga ko‘ra, «Arsenal» Obameyang uchun 63 mln yevro to‘laydi. Uning o‘rniga «Borussiya» «Kyoln»ga tegishli hujumchi Antoni Modestni sotib oladi. Ushbu futbolchi hozirda ijara asosida Xitoyning «Tyanszin Syuanszyan» jamoasida o‘ynamoqda.

Hozircha «Arsenal»ning eng qimmat transferi Aleksandr Lyakazett hisoblanadi. Ushbu futbolchi uchun londonliklar o‘tgan yilning yozida «Lion»ga 60 mln yevro to‘lashgandi.