O‘zbekiston futbol assosiasiyasi hamda Professional futbol ligasi rahbariyati yurtimizda futbolni yangi bosqichga olib chiqish, futbolni ommaviyligini oshirish maqsadida bir qator chora-tadbirlarni amalga oshirmoqda. Jumladan, stadionlarga muxlislarni jalb qilish borasida ham ko‘plab yangiliklar joriy qilinyapti. Superliganing 10-yubiliyey turida stadionlarda  turli ko‘ngilochar dasturlar tashkil qilingani, bu esa stadionlarga tashrif buyurayotgan muxlislarga qo‘shimcha qulayliklarni yuzaga keltirayotgani haqida xabar berib o‘tgandik.

Superliga 11-turida ham muxlislarni stadionlarda ko‘plab qiziqarli yangiliklar kutmoqda.  Jumladan,  11-turdan o‘rin olgan “Lokomotiv” hamda “Buxoro” uchrashuviga tashrif buyurgan muxlislar uchun keytering (oziq-ovqatlar sotuvi) hamda atributikalar sotuvi, bolalar uchun ko‘ngilochar o‘yinlar maydonchasi va klub homiylari tomonidan yutuqli sovg‘alar taqdim qilinadi. Ushbu sovg‘alar orasida 2 million so‘mgacha bo‘lgan vaucherlarni ham mavjud bo‘lib, ushbu vaucherni yutib olgan muxlislarlar klub homiysining  do‘konlari tarmog‘idan o‘ziga kerakli bo‘lgan maishiy texnika mahsulotlariga ega bo‘lishlari mumkin.

“Lokomotiv” – “Buxoro” uchrashuviga kirish tekin. Chiptalar “Lokomotiv” stadioni kassalarida tarqatiladi. O‘yin 11 may kuni soat 20:30da boshlanadi.