Matbuot anjumanining navbatdagi qismida «Neftchi» jamoasi bosh murabbiyi Bahrom Haydarov va jamoa sardori Shukurali Po‘latovlar ishtirok etishdi.

Bahrom Haydarov: - Bugungi o‘yinga tuzgan rejamizni futbolchilarimiz bajarishdi. Ikkinchi raqamda harakat qilgan bo‘lsak ham, qarshi hujumlarda yaxshi harakat qildik. Gol urish uchun imkoniyatlarga ham ega bo‘ldik. Ammo bu bizga nasib qilmadi. O‘yinning oxirida penaltidan gol o‘tkazib yuborish, hamma murabbiy uchun alamli bo‘ladi. Futbolchilarimizga doim ta’kidlaymiz, o‘yin hakamning so‘nggi hushtagi chalinguncha o‘ynalishini. O‘zlaringiz guvoh bo‘ldilaringiz, hatto so‘nggi soniyalarda ham bizda gol urish imkoni bo‘ldi. «Nasaf»ni bugungi g‘alaba bilan tabriklayman. «Nasaf» poydevori baquvvat klub, bu jamoadan yetakchi o‘yinchilar tark etganda ham, o‘rnini boshqa o‘yinchilar to‘ldirib kelaveradi. O‘yinchilar ketgani bu jamoani hech qachon kuchsizlantirib qo‘ymaydi. Bunda murabbiyning ham olib borayotgan ishi sabab deb, o‘ylayman. Jamoaning keyingi omadsizligi bu vaqtinchalik, hali «Nasaf» o‘z so‘zini aytadi. Jamoamizdagi mavjud o‘yinchilarimiz qo‘ldan kelgancha o‘yin namoyish etishayapti. Mana transferga yaqin qolmoqda. Jamoamizni kuchaytirish uchun rejalar tuzganmiz va albatta buni amalga oshiramiz. Maqsadimiz, tajribali futbolchilar bilan jamoamizni kuchaytirmoqchimiz. Bizga endi ortga yo‘l yo‘q.

Shukurali Po‘latov: - Bugun «Nasaf»ga qarshi biz uchun qiyin o‘yin bo‘ldi. Jamoadoshlarim murabbiyimiz ko‘rsatmalari bo‘yicha harakat qilishdi. Qo‘ldan kelgancha o‘ynadik. «Nasaf» jamoasini g‘alaba bilan tabriklayman. Albatta yo‘l qo‘ygan xatolarimiz ustida ishlaymiz. Keyingi o‘yinlarga yaxshiroq tayyorgarlik ko‘ramiz.