Xorvatiya poytaxti Zagreb shahrida sport kurashlari bo‘yicha o‘smirlar o‘rtasida jahon chempionati bo‘lib o‘tmoqda.

Nufuzli musobaqaning erkin kurash bo‘yicha bahslarida yurtimiz sharafini himoya qilgan Jamshid Marufov finalgacha yetib borib, oltin medalni qo‘lga kiritganligi haqida xabar berib o‘tgandik.

E’tiborlisi, o‘zbekistonlik o‘smir erkin kurashchilar so‘nggi marotaba 1998 yilgi jahon chempionatida oltin medal qo‘lga kiritishgandi. O‘shanda yosh Dilshod Mansurov tengdoshlari orasida jahon chempioni unvoniga sazovor bo‘lgandi. Ortda qolgan 20 yil davomida yurtimizdan yunon-rum kurashidan o‘smirlar o‘rtasida, shuningdek, erkin kurash bo‘yicha yoshlar va kattalar o‘rtasida jahon chempionlari yetishib chiqdi. Ammo erkin kurash bo‘yicha o‘smirlar o‘rtasidagi dunyo birinchiligida oltin medalni naqd 20 yil kutgandik.

Bu safar hamyurtimiz Jamshid Marufov bizga uzoq kutilgan oltin medalini taqdim etdi va jahon chempionligiga erishdi. O‘zbekiston Milliy olimpiya qo‘mitasi ushbu tarixiy g‘alaba bilan mamlakat sport kurashlari assosiasiyasi, sportchimiz va uni tarbiyalagan murabbiylarini muborakbod etadi.