"Paxtakor" himoyachisi "Lokomotiv" bilan o‘yindan avval bo‘lajak bahs xususida fikrlarini bildirdi.
- O‘yinga tayyorgarlik yaxshi kechdi. Bellashuvga yuz foiz tayyormiz. Bizni faqat g‘alaba qoniqtiradi. Maydonga yutuq uchun tushamiz. Xudo xohlasa, ishqibozlarimizni muvaffaqiyat bilan quvontiramiz.
"Lokomotiv" haqida qanday fikrdasiz?
- Bu yaxshi va kuchli jamoa. Ular birinchi o‘rinda ketishmoqda, o‘yini yaxshi shakllangan. Ammo biz bahsga to‘liq tayyormiz. Raqibni hurmat qilgan holda faqat g‘alaba uchun maydonga tushamiz.
Jamoaga to‘liq moslashib bo‘ldingizmi?
- Ko‘nikib ketish qiyin bo‘ldi deya olmayman. Chunki ularning ko‘p bilan tanishman, terma jamoalar safida va klubda birga o‘ynaganman. Oldindan bir-birimizni bilganmiz. Shu sababli moslashishda katta qiyinchiliklar bo‘ldi deb o‘ylamayman.
Nima uchun 34-raqamni tanlagansiz?
- "Nasaf"dagi ilk o‘yinimda 34-raqamli libosda maydonga tushgandim. O‘sha bellashuv yomon o‘tmagan. Shundan keyin ushbu raqamni tanlab kelyapman.
Mavsumni jamoa qanday yakunlashiga umid qilyapsiz?
- Kubokda finalga chiqib ulgurdik. Chempionatda ham g‘oliblik uchun kurashni davom ettirmoqdamiz. Biz har ikki musobaqada bosh sovrinni o‘zimizniki qilishni xohlaymiz. Buning uchun oxirigacha bor kuchimizni beramiz.
