Farg‘ona shahridagi viloyat bolalar va o‘smirlar futbol akademiyasida muassasa tarbiyalanuvchilari hamda “Neftchi” klubi a’zolari ishtirokida uchrashuv tashkil qilindi.    Unda “Neftchi” jamoasi murabbiyi Ilhom Zaylobitdinov va futbolchilar Anvar Berdiyev, Sherzod Hakimov hamda  Shukurali Po‘latovlar ishtirok etishdi. Mehmonlarni futbol akademiyasi rahbari Bek Valijonovich Bekov  kutib oldi va hamrohlik qildi.    Dastlab “Neftchi” vakillari va futbol akademiyasi tarbiyalanuvchilari ishtirokida davra suhbati bo‘lib o‘tdi. Unda futbolchilar yosh ijrochilarga millionlar o‘yini dunyosiga qanday kirib kelganliklari, kelajakda mahoratli va professional futbolchi bo‘lib yetishish uchun insondan nimalar talab etilishi hamda yosh futbolchilarni qiziqtirgan savollarga javob qaytarishdi. Davra suhbati ancha samimiy ruhda kechdi.    Shundan so‘ng barcha maydonga yo‘l oldi. Maydonda Berdiyev, Po‘latov hamda Hakimovlar bolalarga mahorat darslarini o‘tashdi. Aytish kerakki, bo‘lajak futbolchilarda viloyatning taniqli futbolchilari bilan birgalikda mashg‘ulot o‘tkazish katta taassurot qoldirdi.