O‘zbekiston Respublikasi Prezidenti Shavkat Mirziyoyev 24 iyul kuni Birlashgan Arab Amirliklari Bosh vazirining o‘rinbosari, Prezident ishlari bo‘yicha vazir Shayx Mansur bin Zoid Ol Nahayon bilan telefon orqali muloqot qildi. Bu haqda Prezident matbuot xizmati xabar berdi.
BAA Bosh vaziri o‘rinbosari birodar Amirliklar xalqi va mamlakat rahbariyati nomidan O‘zbekiston Prezidentini tug‘ilgan kuni bilan samimiy qutlagan. Jumladan, BAA Prezidenti Shayx Xalifa bin Zoid Ol Nahayon, Abu-Dabi Amirligi valiahdi, BAA Qurolli kuchlari Oliy bosh qo‘mondoni o‘rinbosari Shayx Muhammad bin Zoid Ol Nahayon va BAA Vise-prezidenti, Bosh vaziri, Dubay Amirligi hokimi Shayx Muhammad bin Roshid Ol Maktumning dildan tabriklari va ezgu tilaklari yetkazildi.
Eslatib o‘tamiz, Shayx Mansur Angliyaning “Manchester Siti” klubi xo‘jayini sanaladi. Jamoa o‘tgan mavsumda Angliyaning barcha ichki musobaqalari — Angliya chempionligi, kubogi, liga kubogi va superkubogini qo‘lga kiritgandi.