"Breshiya" bosh murabbiyi Fabio Grosso "Roma"ga qarshi o‘yinda hujumchi Mario Balotelli nima uchun qaydnomaga kiritilmaganiga izoh berdi.

"O‘ylashimcha, faqat Balotelli haqida gapirishni to‘xtatishimiz kerak. Matbuot uning so‘zlarini tarqatib, unga enagalik qilmoqda. U jamoa manfaati uchun ishlashi kerak. Shunda u bilan normal munosabatlarga ega bo‘lamiz. Men Mario bilan bu haqda gaplashdim. Men o‘z pozisiyamni o‘zgartirmayman.

Hozir biz musobaqa jadvalining eng quyidamiz. Har bir o‘yinchi o‘z imkoniyatidan yaxshiroq harakat qilgandagina biz u yerdan chiqib keta olamiz. Shunchaki o‘ziga to‘p kelishini kutib turadigan, to‘p kelganda esa bor kuch bilan zarba beradigan va ba’zida darvozaga aniq zarba beradigan hujumchi bizga kerak emas. Bizga har bir to‘p uchun kurashadigan, uni olib qo‘yadigan va jamoadoshlariga yordam beradigan o‘yinchi kerak. O‘zini boshqalardan ustun hisoblaydigan futbolchi "Breshiya"ga kerak emas", – dedi Grosso Sky Sport Italia nashriga bergan intervyusida.

Eslatib o‘tamiz, Mario Balotelli yozgi transfer paytida "Breshiya" safiga qo‘shilgan bo‘lsa, Grosso esa 3 hafta avval jamoani qabul qilib oldi.