«Liverpul» Premyer Liga 23-turi doirasida 7 fevral kuni kechgan bahsda «Manchester Siti»ga yutqazib qo‘ydi (1:4).
«Qizillar» Premyer Liga doirasida ketma-ket uchinchi uy o‘yinini boy berdi. «Liverpul» 1963 yildan buyon Angliya oliy divizionida «Enfild»da ketma-ket uch bor yutqazmagandi.
Avvalroq Yurgen Klopp qo‘l ostidagi jamoa o‘z maydonida «Brayton» (0:1) va «Byornli»ga (0:1) mag‘lub bo‘lgandi. Bundan tashqari «Liverpul» o‘z uyida ketma-ket 5 o‘yindan buyon g‘alaba qozona olmayapti — 3 mag‘lubiyat, 2 durang.
Mersisaydliklar APL doirasida 2009 yilning aprelidan keyin ilk bor o‘z maydonidagi o‘yinda to‘rtta gol o‘tkazib yubordi. 12 yil avval jamoa «Arsenal»ga qarshi o‘yinda 4:4 hisobini qayd etgandi.
Shuningdek, «Liverpul» barcha musobaqalar doirasidagi ketma-ket 19 o‘yindan keyin «Manchester Siti»ga «Enfild»da mag‘lub bo‘ldi. Bundan avval «Siti» «qizillar»ni 2003 yilning may oyida taslim etgandi (2:1).