Superliganing 3-turidan o‘rin olgan «Bunyodkor» - «Andijon» (3:1) uchrashuvidan keyin o‘tkazilgan matbuot anjumanining ikkinchi qismida jamoamiz ustozi Shuhrat Maqsudov ishtirok etdi.

- Avvalo xalqimizni Navro‘z bayrami bilan tabriklayman! Og‘ir va qiyin uchrashuvni o‘tkazdik. Ob-havoning yomg‘irli bo‘lgani ham o‘yining tempiga ta’sir qildi. Qolaversa, «Andijon»ning murabbiylar shtabidan tortib, futbolchilari orasida ham «Bunyodkor» akademiyasida faoliyat yuritgan va tarbiya topgan insonlar bor edi. O‘z-o‘zidan raqib ikki barobar kuch bilan harakat qilishni taxmin qilsa bo‘lardi. Biz ham buni uchrashuvdan oldin futbolchilarga tushuntirgandik. Yigitlar o‘z oldilariga qo‘yilgan vazifani aniq bajarishdi va oxirigacha bor kuchlari bilan to‘p surishdi. Ko‘rdinglar, bir kishi kam bo‘lib qoldik. Shunday bo‘lsa-da, futbolchilar kamchilik ekanliklarini bildirishmay, mehnat qilishdi. Buning uchun ularga rahmat aytaman! VAR haqiqatdan o‘yinning tempiga ta’sir qilmoqda. Bu tushunarli, VAR Superligada bu yildan qo‘llanilmoqda, asta-sekin izga tushib ketadi. Asosiysi, halollik. Mana bugun foydamizga qo‘yilgan penalti bekor qilindi.