Turkiyaning Antalya shahridagi o‘quv-mashg‘ulot yig‘inini davom ettirayotgan “Navbahor” jamoasi bugun Armanistonning “Alashkert” (Erevan) klubiga qarshi nazorat-sinov o‘yini tashkil etdi.
Ushbu bahsda hisobni “lochinlar” ochishdi. Zaxiradan o‘yinga qo‘shilgan hujumchi Andrey Sidorov Ehsoni Panshanbening burchakdan uzatib bergan to‘pini boshi bilan raqib darvozasiga joylab qo‘ydi. Uchrashuv aynan namanganliklarning 1:0 hisobidagi g‘alabasi bilan yakunlandi.
Xabaringiz bor, “Navbahor” 12 fevral kuni Qozog‘istonning “Qayrat” jamoasiga qarshi o‘yin (1:0) o‘tkazgandi, shu bois, bugun murabbiylar shtabi kechagi uchrashuvda maydonga tushmaganlar va nisbatan kamroq daqiqa mobaynida to‘p tepganlarni maydonga tushirib, ularning holatlarini yana bir bor ko‘zdan kechirib olish imkoniyatiga ega bo‘lishdi.
Nazorat-sinov o‘yini
“Navbahor” – “Alashkert” (Erevan) – 1:0
Gol: Andrey Sidorov.
“Navbahor”: Rahimjon Davronov, Xurshidbek Muxtorov, Bobur Mo‘ydinov, Abbos G‘ulomov, Hojiakbar Yunusov, Sardor Telyakov, Jamshid Boltaboyev, Asad Sobirjonov, Islom Kenjaboyev, Ehsoni Panshanbe, Ibrohim G‘anixonov.
Zaxiradan maydonga tushganlar: Muzaffar Mo‘minov, Andrey Sidorov.
Eslatib o‘tamiz, “Navbahor” mazkur yig‘in doirasidagi navbatdagi nazorat uchrashuvini 16 fevral kuni Rossiyaning “Ximki” klubiga qarshi o‘tkazishni rejalashtirgan.
