Afsuski, «Oskar» mukofotiga nomzodlarni fevralda e’lon qilishdi, aks holda, da’vogarlar ro‘yxatiga «Ayaks»ning braziliyalik futbolchisi Antoni ijrosidagi aktyorlik ishi ham kirishi muqarrar edi. Har holda, uning «Feyenoord»ga qarshi bahsdagi qiliqlari shunga ishoradir.

** 93-daqiqa - Antoni raqibi bilan to‘qnashish natijasida o‘rindiqlar joylashgan hudud tomon «uchib», so‘ngra oyog‘idagi og‘riqdan nolib yotdi.

** Braziliyalik o‘yin to‘xtatilmaganini tezda anglab, oqsoqlangan ko‘yi maysaga qaytdi.

** Lekin ahvoli yaxshilanmadi: hujumchi oyog‘ini ushlab turar, Devi Klassen esa klubdoshining orqasiga yengil urib qo‘yardi.

** Shu pallada muammo nimaligidan bexabar Dushan Tadich ishga kirishdi. «Ayaks» sardori shahdam qadamlar bilan Antoni yoniga bordi, uni yerga yotqizib, raqiblar va hakamga futbolchining jarohat olgani, tanaffus kerakligini aytdi.

** Bularning bari «Feyenoord» murabbiyi Arne Slotning qarshisida sodir bo‘layotgandi. U xandon otib kulardi.

** Antoniga tibbiy yordam ko‘rsatilgach, o‘rnidan turdi. Hakam esa uning yoniga kelib, vaqt cho‘zgani uchun sariq kartochka ko‘rsatdi - bu braziliyalik futbolchi uchun o‘yindagi ikkinchi ogohlantirish edi. U avvalroq g‘alaba golini urgach, futbolkasini yechgani uchun ham «sariq»qa loyiq ko‘rilgandi. Oqibatda, uchrashuvni boshqalardan avvalroq yakunlashga majbur bo‘ldi.

** Bu o‘yin haqiqiy spektaklga aylandi, bu o‘rinda braziliyalikning simulyasiyasi bir qism xolos. Antoni 86-daqiqada hal qiluvchi golni urib, hisob 3:2 bo‘lishini ta’minladi, vaholanki, 75-daqiqada «Ayaks» yutqazayotgandi - 1:2. Darvoqe, muvozanat Dushan Tadich tomonidan kiritilgan to‘p evaziga tiklangandi - u ham o‘yin oxiridagi tomosha ishtirokchilaridan biri.

** Ushbu g‘alaba evaziga «Ayaks» Niderlandiya chempionatida birinchi o‘rinni saqlab qoldi: PSV bilan oradagi farq - 2 ochko. Amsterdamliklarning urilgan va o‘tkazib yuborilgan gollardagi farqi fantastik darajada - 80:13.