Yaqin o‘tmishning eng nomdor to‘purarlaridan biri, sanoqsiz chiroyli gollari bilan muxlislar yoqimtoyiga aylangan «Bavariya»ning braziliyalik sobiq hujumchisi Jovanni Elber de Souza 23 iyul kuni 50 yoshga to‘ldi.
Yubilyar xuddi o‘sha oqshom mavsumoldi yig‘inini AQSHda tashkillashtirgan «Bavariya» safida «Manchester Siti»ga qarshi kechgan o‘rtoqlik uchrashuvida maydonga ham tushdi. Germaniya superklubi rasmiy sayti esa o‘yin arafasida afsonaviy hujumchini yubiley bilan qutlab, undan intervyu olishga ham ulgurdi.
- Jovanni, tug‘ilgan kuningiz bilan! Bugun 50 yoshga to‘ldingiz, yubileyni qanday nishonlaysiz?
- Keng miqyosda bayram tashkil etish imkoni yo‘q, axir «Bavariya»ni oldinda «Manchester Siti» bilan o‘yin kutmoqda. Uchrashuv tugashi bilan samolyotda Myunxenga jo‘nayman, do‘stlarim bilan uchrashuv belgilangan. Agar Braziliyaga vaqtida qaytishga ulgursam, yubileyni alohida nishonlayman, albatta.
- «Bavariya»ning AQSH turnesi davomida muxlislar bilan ko‘p muloqotga kirishdingiz, tadbirlarda chiroyli muhit yaratdingiz. Hayotga qiziqishni bir me’yorda saqlab qolganingiz siri bormi?
- Tabiatan o‘zimni shunday tutishga moyilman. Meni butun dunyoga tanitgan klubga xizmat ko‘rsatishim juda muhim. Mana, kecha ham bir guruh muxlislar bilan uchrashdim, ularga dastxat ulashdim. Ochig‘i, bu juda yoqimli ish...
- Demak, Elberni AQSH ko‘chalarida ham tanishadi?
- Ajablanarli, lekin shunday! Aslida fanatlar qurshoviga tushishni sira o‘ylamagandim, axir biz o‘ynagan davrda futbol bu yerda uncha ommalashmagandi. Shunga qaramay, ko‘rdimki, AQSHda ham muxlislarimiz ko‘p. Vashingtondagi mehmonxona oldida to‘plangan fanatlarni ko‘rib, biroz hayratlandim ham. Demak, AQSHda futbol asta-sekin ommalashmoqda.
- O‘zingiz uchun mazkur turneda kuzatilgan eng muhim voqelik...
- «Oq uy»ga tashrif. Tushunarliki, u yerga kirish imkoniyati hammaga ham nasib qilavermaydi. Qarangki, «Bavariya» delegasiyasini saroyga chaqirishdi. Esda qoladigan voqea - tug‘ilgan kunimga munosib sovg‘a!
- Hayotingizning navbatdagi yili uchun qanday orzular bor?
- Hammasi oddiy - sog‘lom holda oldingidek yashashni xohlayman. Umrim davomida deyarli hammasini to‘g‘ri bajardim. Albatta, xatolar ham yo‘q emas, lekin ularni o‘z o‘rnida unutishingiz va qayta takrorlamasligingiz muhim. Xatolar xulosa chiqarish uchun kerak. Umuman, hozir hayotdan zavqlanib yashaydigan yoshdaman. Ertalab uyqudan tursam, og‘riq yo‘q, oilam tinch. Shunda o‘zimga pichirlayman: «Hayot naqadar go‘zal!»
- «Bavariya»ga birinchi navbatda, nima tilagan bo‘lardingiz?
- Albatta, muvaffaqiyat. Klub hamisha yaxshi o‘ynagani va ko‘p sovrin yutgani bilan ajralib turadi. Tilagim bitta - «Bavariya» sovrin to‘plashdan aslo to‘xtamasin!
M.PO‘LATOV tayyorladi
