"Chelsi" tarixidagi eng yaxshi to‘purar futbolchi 2019 yilda jamoa bosh murabbiyligiga saylanadi. Ammo uning davri uzoqqa cho‘zilmaydi. Lempard jamoaga kelganida klub tranfserlar taqiqini olgan, futbolchilar ichida eng yaxshisi sanalgan Eden Azar esa jamoadan ketgandi. Lempard esa nisbatan yosh futbolchilar bilan ishlashga majbur bo‘ladi. Shunga qaramay Lempard ilk mavsumidayoq APLda kuchli to‘rtlikka kiradi, mamlakat kubogida finalgacha yetib boradi. Ammo yangi mavsum ancha qiyin kechdi. Jamoa muammolar girdobida qoladi. Shu sababli Lempard 2021 yilning yanvarida iste’foga chiqarilgan edi. Bu haqida uning o‘zi shunday degandi:
"Men "Chelsi"dagi so‘nggi davrimda klubdagi muhim insonlar, boshqaruvdagilar bilan aloqani yo‘qotib qo‘ygandim. Ammo bu aloqani tiklashga harakat qilishim kerak edi. Chunki keyinchalik mana shu oradagi bo‘shliq muammoga aylana boshladi. Klub faqat mening aybim bilan omadsizlikka uchramagan, albatta. U yerda ikkinchi tomonni ham mas’uliyati bo‘lgan. Chunki har qanday murabbiyga avvalo, qo‘llov kerak. Bu narsa uzoq davom etadigan bo‘lsa, keyinchalik kimdir aybdorga aylanadi. Futbol shavfqatsiz va buni qabul qilish kerak. Siz rahbariyatga ishonganingiz kabi, ular ham sizga qo‘llov bera olishi kerak.
Keling, "Liverpul" va "Manchester Siti"ni eslaylik. Masalan, Yurgen Kloppning APLdagi ilk yili yoki Gvardiola dastlab duch kelgan muammolar... Hammada bo‘ladi. Chunki hech kim mukammal emas. Ish bor joyda kamchilik ham bisyor. Ammo Klopp va Gvardioladagi rahbariyat chidadi va ularga ishondi. Ha, ba’zida sizga bildirilgan ishonch, sizning oldingi ishingizga qarab belgilanadi. Menda esa balki shu narsa yetishmagandir. Menda bu borada eng katta afsusim bor. O‘shanda turnir jadvalida avvalboshda yaxshi ketayotgandik. Lekin birdaniga 2 o‘rindan 9 o‘ringa tushib ketdik. Bu uchun esa atigi 4 ta ketma-ket mag‘lubiyat yetarli bo‘ldi. Men esa ishdan ketdim. Ammo buni hech kim bilmaydi: men o‘shanda jamoa ichidagi yuzlab muammolarni yechish ustida ishlaganman. Bu esa o‘yinga ham ta’sir etgan. Shundan keyin bildimki, bunday qilish kerak emas ekan. Men o‘zimga ishonish kerak ekanini angladim. Odam faqat bitta ishga yaxshi e’tibor qarata oladi".
Frenk Lemparddan o‘sha eng og‘ir deb hisoblagan davrida baxtli bo‘lgan yoki bo‘lmagani haqida so‘ralganida u shundau deydi: "Yo‘q, men baxtli emasdim. Men ilojsiz va xafa edim. Ayniqsa, so‘nggi bir necha hafta o‘ta qiyin kechgan. Ishdan bo‘shatilish esa o‘ta tez kechdi. Nima bo‘lgan taqdirda ham eng sevimli jamoamda bir muddat murabbiylik qilganimdan xursandman".
ISMATOV J.
