Fransiya terma jamoasining sobiq hujumchisi Tyerri Anri "PSJ" hujumchisi Kilian Mbappeni "Manchester Siti" hujumchisi Erling Xolandga qiyosladi.

Eslatib o‘tamiz, Chempionlar ligasi guruh bosqichining 1-turida ikkala futbolchi ham raqiblari darvozasiga ikkitadan gol urishdi. Fransiyalik futbolchi “Yuventus”ga (2:1), norvegiyalik hujumchi “Sevilya”ga (4:0) ikkita gol urdi.

“Mbappe vaziyat yaratishi va gol urishi mumkin. Xoland hech narsa yaratmaydi - u faqat hujumlarni yakunlaydi. Mbappe o‘ngda, chapda va markazda o‘ynay oladi. Xoland faqat markazda o‘ynay oladi", — dedi Anri RMC Sport bilan suhbatda.

Sobiq futbolchining so‘zlariga ko‘ra, Xoland bilan "Manchester Siti" Chempionlar ligasida g‘alaba qozonishi mumkin, ammo u bu bahsda o‘z ovozini Mbappega beradi.

23 yoshli Mbappe joriy mavsumda "PSJ" safida 6 ta o‘yinda maydonga tushib, 9 ta gol urdi. 22 yoshli Xoland hisobiga “shaharliklar” uchun sakkizta uchrashuvda 12 gol va bitta golli uzatma yozildi.