"Tottenxem" hujumchisi Xarri Keyn "Bavariya"ga o‘tishni tezlashtirish uchun jamoasiga qarshi boykot qilishga tayyor.
Sport Bild nashri xabariga ko‘ra, angliyalik futbolchi bir yildan so‘ng erkin agent sifatida jamoani tark etishi bilan prezident Daniel Leviga tahdid qilishga tayyor.
Eslatib o‘tamiz, Keyn avvalroq Angliya Premyer-ligasida qolishga qaror qilgan bo‘lsa-da, keyinroq "Bavariya"ga o‘tishga rozi bo‘lgandi. "Tottenxem" hozircha futbolchini qo‘yib yuborishni qat’iyan rad etgan, ammo Xarri vaziyatni o‘zi o‘zgartirishga umid qilmoqda.
Agar Keyn "Tottenxem"ni tark etsa, transfer 100 million yevrodan oshadi va bu ingliz futbolchisini "Bavariya" tarixidagi eng qimmat futbolchiga aylantiradi.