Jeydon Sanchoning "Manchester Yunayted"dagi o‘ta omadsiz davri yakuniga yetmoqda. Ammo bu narsa na futbolchi, va na klub uchun muammoni yechimi bo‘la oladi. Sancho eski klubida yana sport formasiga qaytib olish uchun tinmay mehnat qilishi kerak bo‘lsa, "MYU"dagilar Sancho o‘rniga yangi vakil topishi kerak. Ha, endigi variant 73 million funtlik bo‘lmasligi aniq. Ammo muqobil zarur. Negaki, Erik ten Xag oldiga klubni YECHL pog‘onalarida ushlab qolish vazifasi qo‘yilgan. Buni faqatgina Garnacho yoki Antoni bilan amalga oshirib bo‘lmaydi. Quyida "MYU" uchun ehtimoliy variantlar keltirib o‘tiladi.
Maykl Olise – "Kristal Pelas"
"Manchester Yunayted" o‘z tarixidagi yangi davrni boshlamoqda. Bu davr bunyodkori Ser Jim Retkliff bo‘ladi. Xabarlarga ko‘ra, klub yangi rahbariyat qo‘l-ostida Maykl Oliseni sotib olmoqchi. Fransuz vingeri avgust oyida "Kristal Pelas" bilan yangi shartnoma tuzgan. Ayrim manbalar bu bitimga 70 million funtlik tovon puli kiritilganini aytadi. Ammo bu Olisening darajasi oldida unchalik ham qimmat tuyulmaydi. 2023 yilning so‘nggi beshta bahsida, Olise jami 5 ta golda bevosita ishtirok etdi. Shunday ekan, u Antoni o‘rnini egallashga qodir futbolchi. Xarholda, shunday umidlar bor.
Pedru Netu – "Vulverxempton Uonderers"
Netuning ustunligi shundaki, u har ikki qanotda birdek foydali harakat qila oladi. Garchand jarohatga moyil bo‘lsada, portugaliyalik hujumchi jamoasini og‘ir vaziyatlardan olib chiqib keta oladi. Ayni damda u yaxshi sport formasida va "Vulvz"ning muhim o‘yinlarida o‘zini ko‘rsata olmoqda. Aynan uning sa’y-harakatlari bilan sentyabr oyida "bo‘rilar" "Manchester Siti"ni mag‘lubiyatga uchratgan edi.
"MYU" uchun 23 yoshli futbolchiga erishish oson kechmaydi. Negaki, Netu "Vulvz" bilan uzoq yillik shartnomaga ega.
Federiko Kyeza – "Yuventus"
Kyeza Yevro-2020dagi qahramonliklaridan keyin katta yulduzga aylangandek ko‘ringan edi. Ammo jarohatlar unga o‘sish uchun halaqit qildi. Kyeza ko‘pchilikka tanish nom bo‘lishiga qaramay, o‘z darajasini namoyish etishga qiynalmoqda. Aytish mumkinki, u hozirda oldingidek samarador futbolchi emas. Kyezaning yaxshi tomonlari ham ko‘p. Shulardan biri bu hujum chizig‘ining istalgan nuqtasida o‘ynay olishidir. "Yuventus" yaxshi taklif uchun uni sotib yuborishga qarshi bo‘lmaydi.
Niko Uilyams – "Atletik"
Transferlar oynasi mish-mishlar taxtasidan joy olib turgan yana bir nom bu Niko Uilyamsdir. Ispaniya terma jamoasi a’zosi "Atletik Bilbao"ning eng ko‘zga ko‘ringan yulduzlaridan biri sanaladi. U yanvarda ko‘plab klublar tomonidan sotib olinishi mumkin bo‘lgan nom sifatida e’tirof etilgan. Bu borada "Barselona"ni jiddiy da’vogar sifatida kӯrsatish mumkin. Uilyams har ikki qanotda o‘ynash bilan birga pleymeykerlik qobiliyatlarini ham yaxshi egallagan. Uni Olise va Netuning qo‘shilmasi deyish mumkin. Ya’ni har ikki futbolchidagi qobiliyatni Uilyams o‘zida jo qila olgan. Ammo unda APL tajribasi mavjud emas. Shunga qaramay, "MYU" unga e’tibor qaratsa bo‘ladi. Negaki, Uilyams xaridi kelajakka qilingan muvaffaqiyatli sarmoya bo‘ladi.
ISMATOV J.
