Belgiyaning "Antverpen" klubi bosh murabbiyi Mark van Bommel jamoasi bosh murabbiyligidan iste’foga chiqdi, deya xabar bermoqda jurnalist Fabrisio Romano.
Manbaning xabariga ko‘ra, uning jamoani tark etish haqidagi qarori yaqin kunlarda ma’lum bo‘ladi. Qayd etilishicha, qaror niderlandiyalik mutaxassis tomonidan "yangi bobni boshlash" maqsadida qabul qilingan. Shu bilan birga, van Bommel amaldagi shartnomasi 2024/2025 yilgi mavsum yakuniga qadar tuzilganiga qaramay, joriy mavsum yakunida jamoa bosh murabbiyligini tark etadi.
Mavsum yakunida Stefano Pioli ketganidan so‘ng, Mark van Bommel "Milan" bosh murabbiyi lavozimini egallash uchun favorit ekani avvalroq xabar qilingandi.
Niderlandiyalik murabbiy 2022 yilning iyulida "Antverpen"ni qabul qilib olgandi. Uning qo‘l ostida jamoa Belgiya chempioni va mamlakat kubogi sohibiga aylandi, shuningdek, Chempionlar ligasi guruhida ham o‘ynadi. "Antverpen" bu mavsumda Belgiya Pro-ligasining bronza medali sovrindori bo‘lish imkoniyatiga ega.
