«Arsenal» Premyer-liga chempionligi taqdimotiga tayyorgarlik ko‘rdi.

Bugun «kanonirlar» Angliya chempionatining 38-turi doirasida «Everton»ga qarshi bahs olib boradi. Agar g‘alaba qozonsa va «Manchester Siti» «Vest Xem»ni mag‘lub etmasa, ular chempion bo‘lishadi.

Ijtimoiy tarmoqlarda London klubi xodimlari kubokni topshirish uchun mashq qilgani aks etgan video paydo bo‘ldi.

Klub maydon bo‘ylab «Premyer-liga chempionlari» yozuvi tushirilgan bannerlarni o‘rnatdi, markaziy aylanada esa turnir logotipi tushirilgan sahna o‘rnatildi. 

«Arsenal» xodimlari xuddi o‘yinchilar medallarini topshirayotganda qilganidek, safga tizilib, birin-ketin sahnaga chiqishdi.

Bugun tashkilotchilar «Arsenal» stadioniga ham, «Manchester Siti» arenasiga ham chempionlik kubogi va 40 ta medallar jamlanmasini olib kelishadi.