World Boxing tashkiloti yana 5 ta milliy federasiyani tarkibiga qo‘shib olganini ma’lum qildi.

Xitoy Taypeyi, Pokiston, Butan, Fiji hamda Ekvador boks federasiyalari World Boxing tashkiloti a’zoligiga qabul qilindi. Shu tariqa tashkilotga a’zo davlatlar soni 42 taga yetdi.

“Men Xitoy Taypeyi, Pokiston, Butan, Fiji va Ekvadorni World Boxingga qo‘shilganidan xursandman va ularning har biri bilan Olimpiya boks harakatining markazida bo‘lishini ta’minlash uchun yaqindan hamkorlik qilishni intiqlik bilan kutmoqdaman. Xalqaro boks o‘zgarishlarga muhtoj. Ko‘plab milliy federasiyalar Olimpiya harakati doirasida boksning kelajagi bo‘lishini ta’minlashning yagona yo‘li World Boxingga qo‘shilish ekanini tushunmoqda”, dedi World Boxing prezidenti Boris van der Vorst.

XOQ tomonidan tan olinishi uchun esa tashkilot a’zolar soni uch mintaqadan kamida 50 ta davlatdan oshishi lozim.

Tashkilot yana tez orada yangi a’zolar qo‘shilishini ma’lum qilgan. Tashkilot XOQ tomonidan tan olinsa, a’zolar 2028 yilgi Los-Anjeles Olimpiadasida ishtirok etishi mumkin bo‘ladi.