Kataloniyaning “Barselona” klubi “Galatasaroy” hujumchisi Viktor Osimxenni o‘z safiga qo‘shib olishi mumkin. Bu haqda Mundo Deportivo nashri xabar berdi.

Manbaga ko‘ra, kataloniyaliklar nigeriyalik forvardni Robert Levandovski uchun munosib o‘rinbosar sifatida ko‘rmoqda. “Barselona” rahbariyati 2024-yilda ham Osimxenni o‘z safiga qo‘shib olmoqchi bo‘lgan edi, biroq mazkur transfer noma’lum sabablarga ko‘ra amalga oshmagan.

Endi esa kataloniyaliklar yana nigeriyalik forvardni o‘z safiga qo‘shib olishga harakat qilib ko‘radi. Lekin transfer uchun asosiy to‘siq futbolchining juda yuqori narxi bo‘lib turibdi. “Galatasaroy” 26 yoshli hujumchini o‘tgan yozda 75 million yevroga xarid qilgan va uni bundan arzon narxda sotish niyatida emas.

Avvalroq OAVda “Barselona” “Yuventus” hujumchisi Dushan Vlahovich bilan shartnoma imzolashi mumkinligi haqida xabarlar tarqalgandi. Shuningdek, kataloniyaliklar “Atletiko”ning argentinalik futbolchisi Xulian Alvares nomzodini ham ko‘rib chiqmoqda.

Ma’lumot uchun, Osimxen joriy mavsumda barcha musobaqalar doirasida jami 9 ta o‘yinda maydonga tushib, o‘z hisobiga 6 ta gol yozdirib qo‘ygan. Uning klub bilan shartnomasi 2029 yil yozigacha amal qiladi. Transfermarkt portali nigeriyalik futbolchining qiymatini 75 million yevroga baholamoqda.