23 iyulga o‘tar kechasi AQSHning Mayami shahridagi «Nu Stedium»da MLS 2026 yilgi mavsumi doirasida «Inter Mayami» o‘z maydonida «Chikago Fayr»ni qabul qildi. Uchrashuv mezbonlarning 3:2 hisobidagi g‘alabasi bilan yakunlandi.

Mehmonlar 18-daqiqada hisobni ochishdi. Gol «Inter Mayami» darvozaboni Rokko Rios Novoning avtogoli sifatida qayd etildi. Maydon egalari esa 51-daqiqaga kelib Luis Suaresning ikki goli evaziga oldinga chiqib oldi. Urugvaylik hujumchi ushbu bahsda dubl qayd etdi.

67-daqiqada janubiy afrikalik hujumchi Puso Ditejane «Chikago Fayr» hisobni tenglashtirdi. Ammo 87-daqiqada zaxiradan maydonga tushgan amerikalik futbolchi Preston Plembek g‘alaba golini kiritib, «Inter Mayami»ga uch ochko taqdim etdi.

Argentinalik yulduz Lionel Messi ushbu uchrashuvda ishtirok etmadi. «Chikago Fayr»ning yangi a’zosi, polshalik hujumchi Robert Levandovski MLSdagi debyut bahsida 63 daqiqa harakat qildi, ammo samarali harakat qayd eta olmadi.

Bu g‘alaba orqali «Inter Mayami» MLSdagi g‘alabali seriyasini beshta o‘yinga yetkazdi. «Chikago Fayr» esa ketma-ket uchta g‘alabadan iborat seriyasini yakunladi.

Ayni paytda «Inter Mayami» 16 ta o‘yindan keyin 34 ochko bilan Sharqiy konferensiyada ikkinchi o‘rinni egallab turibdi. «Chikago Fayr» esa 26 ochko bilan uchinchi pog‘onadan joy olgan.

Keyingi turda, 26 iyul kuni «Inter Mayami» safarda «Klyob de Fut Monreal» mehmoni bo‘ladi. «Chikago Fayr» esa mehmonda «Nyu-York Siti»ga qarshi maydonga tushadi.