«Лацио» раҳбарияти жамоа бош мураббийи Женнаро Гаттузони узоқ муддатга клубда олиб қолиш ва унинг маошини ошириш ниятида. Бунга италиялик мутахассиснинг муваффақиятли натижалари ҳамда Европанинг айрим клублари унга қизиқиш билдираётгани сабаб бўлмоқда.
48 ёшли мураббий Италия терма жамоасидаги омадсиз фаолиятидан кейин Рим клубини қабул қилиб олган эди. Унинг қўл остида «Лацио» жорий мавсумда ажойиб натижалар қайд этмоқда. Жамоа Италия чемпионатининг дастлабки 10 турида 30 очкодан 28 тасини қўлга киритиб, турнир жадвалида пешқадамлик қилмоқда.
Гаттузо дастлаб клуб билан бир йиллик шартнома имзолаган. Келишувда жамоа чемпионатни кучли 12 таликда якунласа, ҳамкорликни яна бир мавсумга автоматик узайтириш банди мавжуд. Айни пайтда мураббийнинг йиллик маоши солиқлардан ташқари 1,2 миллион еврони ташкил этади. Бу кўрсаткич Италиянинг етакчи клублари мураббийлари орасида энг пастларидан бири ҳисобланади.
«Il Messaggero» нашрининг «La Lazio Siamo Noi»га таяниб хабар беришича, Гаттузонинг Римдаги муваффақиятли фаолияти Европанинг бир қатор клублари эътиборини тортган. Айрим жамоалар келаси ёзда у билан ҳамкорлик қилиш имкониятини ўргана бошлаган.
Шу боис «Лацио» президенти Клаудио Лотито ва спорт директори Анджело Фабиани мураббий билан янги, молиявий шартлари яхшиланган узоқ муддатли битим тузишни режалаштирмоқда. Бу орқали клуб бошқа жамоаларнинг эҳтимолий таклифларига тўсиқ қўймоқчи.













