ФИФА президенти Йозеф Блаттер 2022 жаҳон чемпионати мезбонлигини АҚШ эмас, Қатар ютганидан хафа бўлганини тан олди. Бу ҳақда у Financial Times нашрига берган интервьюсида тан олиб ўтган.
«Овоз бериш яширин бюллетенлар орқали амалга оширилган. АҚШ Европанинг тўртта овозини бой берди ва ҳисоб Қатар фойдасига 14:12 кўринишини олди. Агар ўшанда АҚШ ғолиб бўлганида биз ФИФАдаги муаммолар ҳақида эмас, балки Россия ва штатларда ўтган ажойиб ЖЧлар ҳақида гаплашиб ўтирган бўлардик».
«Сиз ўшанда конвертни очиб ЖЧ-2022 мезбонлигини Қатар ютганини эълон қилганимда юзимни кўрганмисиз? Ўша пайтда мен хурсанд одамлар қаторида эмасдим», — дея қайд этиб ўтган Блаттер.
Эслатиб ўтамиз, бугун швейцариялик мансабдор ЖЧ-2018 мезбонлиги Россияга сирли келишув асосида олиб берилганини маълум қилганди.
Блаттернинг сўзларига кўра, ЖЧ-2018 ва ЖЧ-2022 иккита етакчи давлат — Россия ва АҚШга олиб берилиши керак бўлган. Бироқ сўнгги дақиқаларда ўша пайтда Франция президенти лавозимида ўтирган Николя Саркози УЕФА президенти Мишель Платинини АҚШни эмас, Қатар вариантини қўллаб-қувватлашга кўндирган.
