Йўқ, мен водийлик эмасман, аммо футболимиз тарихида муҳим ўрин тутувчи ҳудуд жамоаларининг бугунги ҳолатига чин юракдан ачиняпман.

Ўзи Фарғона, Наманган ва Андижон вилоятлари футбол мутасаддилари қаерга қарашяпти? Наҳотки, «Нефтчи»нинг шонли даври ўтмишда қолган, «Навбаҳор»нинг сержило ўйинлари хаёлга айланган бўлса? Олий лигамизда чинакам рақобат юзага келиши учун водийга лоақал битта кучли клуб зарурлигини айтсам, янги велосипед ихтиро қилган ҳисобланмайман. Ўйлашимча, ЎФФ ҳам бу масалага жиддий ёндашиши лозим. Зеро, Фарғона водийсида кучли клуб шакллантириш биринчи навбатда, миллий чемпионатимиз, қолаверса, терма жамоаларимиз учун ҳам жуда муҳим. Вақтида миллий жамоамизга не-не футболчиларни етказиб берган клублардан ҳозирда ҳаттоки, номзод йўқлиги ачинарли эмасми? «Нефтчи»нинг ўз майдонидаги ўйинига 1285 мухлис тушганини қандай изоҳлаш мумкин? Демоқчиманки, юртимизда футболга қизиқиш даражасини яхшилаш учун ҳам (албатта, мухлисларнинг стадионга ташрифи бўйича) водий футболига алоҳида эътибор қаратиш зарур. Ахир пойтахтда мухлисларни йўқотганимиз камми?

Зоҳир САДИКОВ, Пскент тумани.