Испания суди Неймарнинг «Сантос» клубидан «Барселона»га ўтиши билан боғлиқ можаро юзасидан очилган жиноий ишни такроран кўриб чиқишга қарор қилди.
Шу йилнинг июль ойида бу иш етарли далиллар бўлмагани сабабли ёпилган эди. Аммо Испания солиқ хизмати бу ишни қайтадан кўриб чиқиш ҳақида мурожаат қилди ва у қаноатлантирилди.
Associated Press хабарига кўра, энди прокуратура 10 кун ичида Неймар, унинг отаси, «Барселона»нинг собиқ президенти Сандро Росель ва «Сантос» президенти Одило Родригесга айблов эълон қилиши шарт.
Гап шундаки, 2013 йилда Неймар «Барселона»га ўтганида, DIS инвестиция компанияси унинг трансфер нархининг 40% миқдорида маблағ олиши керак бўлган. Аммо уларга 17,1 млн евро тўланган. Ваҳоланки, футболчининг траснфер нархи 83,3 млн еврони ташкил қилган ва компания 33 млн евро олиши шарт бўлган. Трансферни амалга оширган шахслар футболчининг нархини пасайтириб кўрсатишган.
