«Ислом бирдамлик ўйинлари»да иштирок этиш учун жўнаб кетган ўзбекистонлик 9 нафар боксчидан 3 нафари – Абдулҳай Шораҳматов (-56 кг), Мироншох Ибрагимов (-49 кг) ва Бобо Усмон Батуров (-69 кг) ярим финал йўлланмасини қўлга киритди.
Бугун, 16 май куни Ўзбекистон шарафини ҳимоя қилаётган яна 3 нафар боксчи чорак финал доирасида рингга кўтарилади. -52 килограммгача бўлган вазнда Аброржон Қодиров чорак финал доирасида озарбайжонлик Маъсуд Юсуфзога қарши жанг қилади.
-64 килограмм вазндаги Алиёр Норалиев мезбон боксчиси Элвин Исаев билан куч синашади. -75 килограмм вазн тоифасидаги эса Маҳмуд Ғоипов қозоғистонлик Турсинбай Кулаҳметга қарши жанг ўтказади.
Шунингдек, -60 килограмм вазндаги Улуғбек Дўстмуродов ярим финал йўлланмаси учун қозоғистонлик Заурбек Султанга қарши кураш олиб боради. Ушбу жанг санаси кейинроқ маълум бўлади. -91 килограмм вазн тоифасидаги Сардор Бегалиев ўз жангини ҳали ўтказмади.
Аввалроқ ўзбекистонлик Мадиёр Саидраҳимов (-81 кг) биринчи жангидаёқ мағлубият аламини тотиб кўргани ҳақида хабар берилганди.
