"Милан" ҳужумчиси Златан Ибрагимович коронавирус пандемиясининг бошланишига ўз услубида муносабат билдирди. Хусусан, швед ҳужумчиси Италияга касалхоналарни молиялаштириш орқали вирусдан халос бўлишга ёрдам бермоқчи.
"Италия менга доим кўп нарса бериб келган ва мен ҳам мушкул пайтда бу мамлакатга ёрдам бермоқчиман. Ҳамкасбларим билан бирга гуманитар касалхоналар учун маблағ йиғишни ташкил этишга ва бунда ижтимоий тармоқлардаги саҳифаларимдан фойдаланишга қарор қилдим.
Мен жамоадошларимнинг ва бошқа спортчиларнинг сахийлигига, шунингдек, коронавирусни мағлуб этиш учун ҳар қандай маблағни эҳсон қилишларига ишонаман. Биз ростдан ҳам ҳаётимизни сақлаб қолиш учун фидокорона ишлайдиган шифохоналар, шифокорлар ва ҳамшираларга ёрдам бера оламиз.
Энди бу пандемиядан биргаликда қутулиб, ўйинда ғолиб бўлайлик. Эсингизда турсин: вирус агар Златанга келмаса, Златан вирусга боради", – деди Златан инстаграмдаги видеомурожаатида.
