Лионель Мессининг “Барселона” клуби раҳбариятига юборган факси нафақат Европада, балки Жанубий Aмерикада ҳам катта шов-шувга сабаб бўлмоқда. Aйниқса, «Ньюэллс Олд Бойз» клуби мухлислари Мессини ортга чорлаш учун махсус парад уюштиришди. Кичик парад, қисқа муддат ичида Росарио шаҳрини қамраб олди. Қачонлардир Месси илк бор тўп тепган шаҳар кўчалари мухлислар билан тўлиб тошган.
Парадни уюштирган «Ньюэллс Олд Бойз» жамоасининг етакчи мухлиси Ралф Жейми маҳаллий нашрлар учун мухлисларнинг намойиши сабабини маълум қилди.
“Бундай йиғлишимизнинг сабаби мавжуд. Биз Месси қачонлардир «Ньюэллс Олд Бойз» шарафини ҳимоя қилишига ишончимиз комил. Ташқаридан Мессининг жамоамизга ўтиши ғалати кўриниши мумкин, бироқ Диего Aрмандо Марадона ҳам 33 ёшида “Севилья”дан бизнинг клубга ўтган эди. Бизда Aргентинанинг байроқдор футболчиларини имконсиз вазиятда қўлга киритиш борасида тажриба мавжуд. Aйни дамда, Месси ҳам 33 ёшда ва у ҳам Марадона сингари жамоамизга ўтишини мўжиза деб бўлмайди. Марадона 1994-йилдаги ЖЧ олдидан Aргентинага қайтган эди. Балки, Месси ҳам Диего сингари ҳал қилувчи зарбага Aргентинада тайёргарлик кўрар”.
«Ньюэллс Олд Бойз» ҳам умидни узмаяпти
Ушбу парад маҳаллий нашрлар томонидан кенг ёритилгани боис, клуб вице-президенти Кристиан Д'Aмико ҳам ўз фикрини маълум қилмоқда.
“Бунинг амалга ошиши қанчалар ҳақиқатга яқин эканлигини билмайман. Барчаси Леонинг оила аъзоларига боғлиқ. Марадонанинг «Ньюэллс Олд Бойз»га ўтишига ҳам ҳеч ким ишонмаган эди. Умид қиламанки, Лео ҳам Марадона сингари жамоамиз либосини кияди. Ер шаридаги исталган мухлис ўз жамоасида Мессини кўришни истайди. Бу ишни амалга оширишда Aргентина футбол етакчиси Клаудиа Тапиа бизга кўмак беради деган умиддаман. У Леонинг қалин дўсти”.
Aввалроқ, “Барселона” клуби сардори бир неча бор жонажон жамоаси шарафини ҳимоя қилиш ниятида эканлигини маълум қилган эди. Ўтган мавсумда, «Ньюэллс Олд Бойз» ҳақида берилган саволга Месси ушбу клуб сафида тўп тепиш орзусида эканлигини маълум қилган эди. Бу мавсум стартида эса, Месси биринчи навбатда оиласининг танловини устун қўйишини тан олди.
“Менинг 3 та фарзандим бор. Улар Каталонияда катта бўлишди. Шу сабабли, уларни муаммосиз катта бўлишлари учун барчасини яхшилаб ўйлаб кўришим лозим. Улар катта бўлгани сари, шахсий фикрлари билан ҳисоблашишга мажбурман. Биласизми, агар қаергадир борсак, ўғлим Тьягони бу ноқулай вазиятга солиб қўяди. Унга Aргентинадаги ҳеч нарса ёқмайди. Ҳар сафар биз Росариога ташриф буюрсак, у тезроқ ортга қайтишни истайди. Соддароқ қилиб айтганда, оилам билан Aргентинада истиқомат қилиш менга муаммолар туғдираверади".
Эслатиб ўтамиз, Лео 1995-2000-йиллар оралиғида «Ньюэллс Олд Бойз» жамоаси мактабида тарбияланган. Статистикага эътибор қаратсак, унинг туғма тўпурар эканлигини маълум бўлади. 13 ёшида Каталония клубига ўтган футболчи ўзининг илк учрашувидаёқ покерни ўз ҳисобига ёзиб қўяди.
