Хитойнинг «Шанхай СИПГ» клуби яримҳимоячиси Одил Аҳмедов уч йиллик фаолиятидан кейин клуби билан хайрлашган. Бу ҳақда Tribuna.uz сайти ёзмоқда.
Манбанинг хабарига кўра, Ўзбекистон миллий жамоаси сардори Шанхай клубини тарк этиш сабабларини ҳозирча маълум қилмади. Одил Аҳмедов Хитой Суперлигасининг бошқа бир клуби - «Тяньцзинь Тэда» жамоаси сафига ўтиши кутилмоқда.
32 ёшли яримҳимоячимиз «Шанхай СИПГ» клуби сафидаги сўнгги тур ўйинида майдонга тушмаган ва натижада клуби мавсумдаги илк мағлубиятни қарши олганди. «Шанхай СИПГ» клуби Хитой Суперлигаси 9-туридан кейин 8 жамоа жой олган «В» гуруҳида 20 очко билан пешқадамлик қилмоқда.
Маълумот учун, Одил Аҳмедов жорий мавсумда клуби сафида 8 ўйинда майдонга тушиб, битта гол ва битта голли узатмага муаллифлик қилганди.
