«Барселона»нинг собиқ футболчиси Хави Қатарнинг «Ал-Садд» жамоасини бошқаришда давом этади.

41 ёшли мутахассис шартномасини 2023 йилгача узайтирди.

«Мен «Ал-Садда» фаолиятимни давом эттираётганимдан фахрланаман. Биз биргаликда кўп нарсаларга эришдик, голлар урдик, учрашувларда ва кубокларда ғалаба қозондик ва барчамиз бу муваффақиятлардан жуда хурсандмиз.

Бундай қўллаб-қувватлашдан ҳар қандай мураббий мамнун бўлган бўлар эди. Шартномадаги исталган вақтда кетишимга имкон берадиган банд ҳақидаги гаплар шунчаки миш-миш.

Менинг «Ал-Садд» билан икки мавсумга шартномам бор ва мен келишувни ҳамда томонларнинг битимга доир барча расмий музокара усулларини ҳурмат қиламан», - деди мураббий.

Маълумот ўрнида, Хави «Ал-Садд» бош мураббийлиги лавозимини 2019 йил май ойида эгаллаган. Унинг раҳбарлигида клуб Қатар чемпионига айланди.

Шунингдек, икки марта Қатар валиаҳд шаҳзодаси кубогини қўлга киритди. Бундан ташқари, Шайх Яссим кубоги, Қатар юлдузлари кубоги ва Қатар амири кубокларига эга чиқди.