Осиё Чемпионлар Лигасини ғалаба билан бошлаганига қарамай, «Ал-Жазира» бош мураббийи, бельгиялик Франк Веркотерен истеъфога чиқарилди ва унинг ўрнига бразилиялик Кайо Жунияр тайинланган. Бу ҳақда БААнинг «The National» нашри хабар бермоқда.

Эслатиб ўтамиз, 7 март куни «Ал-Жазира» Қаршида «Насаф» меҳмони бўлиб, 4:2 ҳисобида иродали ғалабага эришган эди.

«Бизда бундан бошқа имконият қолмади. Веркотерен футболчилар билан тил топиша олмади. Биз ўртада мувозанатни тиклашга ҳаракат қилдик, аммо барча ҳаракатлар зое кетди. Биз ниманидир ўзгартиришимиз керак эди», деди клуб профессионал қўмитаси раҳбари Ҳамад ас-Сувайдий.

«Ушбу қарор қайд этилаётган натижалардан келиб чиқиб қабул қилингани йўқ — биз бундай иш олиб бормаймиз. Гап мураббий ва футболчилар ўртасидаги мувозанат ҳақида бормоқда. Мавсум ўртасида мураббий алмаштириш «Ал-Жазира» учун хос одат эмас», деди ас-Сувайдий.

«Биз янги мураббийни уч ҳафта давомида изладик. Мавсум ўртасида мураббий излаш ғоят оғир иш. Бизда бир қатор номзодлар бор эди, аммо охир-оқибат, бир ҳафта аввал Кайо Жуниор номзодида тўхтадик. У Форс кўрфазида ишлаш тажрибасига эга, шунингдек, «Ал-Жазира»га қарши майдонга ҳам чиққан», деди «Ал-Жазира» раҳбари.

54 ёшли Франк Веркотерен ўтган йилнинг август ойида Бельгиянинг «Генк» клубидан «Жазира»га келган эди. Унинг икки йиллик шартномаси, маълумотларга кўра, 36 миллион дирҳамга тенг эди.

Бельгиялик мутахассис ўзининг бутун мураббийлар штаби, хусусан, англиялик дарвозабонлар мураббийи Дэвид Коулз билан бирга истеъфога чиқарилган. «The National»нинг қайд этишича, Веркотереннинг ишдан бўшатилиши БАА чемпионати профессионал лигага айлантирилган 2008 йилдан бери 58-мураббий истеъфоси ҳисобланади.