Фарғонанинг «Нефтчи» клуби ОФК Кубоги гуруҳ босқичидаги ўз майдонидаги иккинчи ўйинда ҳам ғалаба қозонди. Уммоннинг «Ал-Уруба» жамоасига қарши баҳсда Саркисян шогирдлари 3:1 ҳисобида ғалаба қозонишди.

Учрашувда ҳисоб 11-дақиқада очилди. Иқбол Акрамовнинг чап қанотдан узатган пасидан сўнг Бахтиёр Ёқубов тўпни боши билан рақиб дарвозасига санчиб қўйди.

Тезкор гол, албатта, «Нефтчи» футболчиларига яхши таъсир қилди ва улар ҳужумкорлик сусайтиришгани йўқ. Тайм якунланиши арафасида ҳужумчи Отабек Исроиловга нисбатан ишлатилган қўполлик учун малайзиялик ҳакам Ваҳоб Муҳд Файз Уммон клуби дарвозаси томон пенальти белгилади. 11 метрлик жарима тўпини эса тажрибали Анвар Бердиев голга айлантирди. Таъкидлаш жоиз, Бердиев «Ал-Виҳдат»га қарши 1-тур учрашувида ҳам гол урган ва ўша гол «Нефтчи»га ғалаба келтирган эди.

62-дақиқага келиб ҳисоб 3:0 кўринишига етди. Отабек Исроиловнинг тўп узатишидан сўнг «Нефтчи» сардори Мансур Саидовни тўпни рақиб дарвозасининг узоқ бурчагига тўғрилаб қўйди.

Учрашувнинг асосий вақтига ҳакам томонидан қўшиб берилган сўнгги дақиқаларда уммонлик футболчилар ҳисоб қисқартирувчи голни уришга муваффақ бўлишди. Бундан ортиғига уларнинг вақти ҳам, кучи ҳам етгани йўқ.

Ушбу ғалабадан сўнг «Нефтчи» «D» гуруҳидаги пешқадамлигини янада мустаҳкамлаб олди. Жамоа ҳисобида айни вақтда 7 очко бор. Мағлубиятга учраган «Ал-Уруба» ҳамда Тошкент вақти билан 20:00да Ҳиндистоннинг «Салгокар» клубига қарши майдонга тушадиган Иорданиянинг «Ал-Виҳдат» жамоалари ҳисобида 3 очкодан бор. Ҳинд клуби эса бирорта очкосиз гуруҳда сўнгги ўринни эгаллаб турибди.

«Нефтчи» «Ал-Уруба»га қарши жавоб учрашувини 10 апрель куни ўтказади.

ОФК Кубоги, гуруҳ босқичи
«D» гуруҳи, 3-тур учрашуви
4 апрель, чоршанба
«НЕФТЧИ» (Ўзбекистон) – «АЛ-УРУБА» (Уммон) 3:1 (2:0)
Голлар: Бахтиёр Ёқубов (11), Анвар Бердиев (40-пенальти), Мансур Саидов (62) — Данило Тейшейра (90+4).
Четлатиш: Абдуллоҳ Солиҳ (86, «Ал-Уруба»).