"Барселона" президенти Сандро Росельнинг таъкидлашича, Европа чемпионлар лигаси ярим финалида "Челси"га қарши ўтган ўйинлардаги муваффақиятсизлик Каталония клубини тўпни назорат қилиш ва кўпюришли комбинацияларга асосланган ўзига хос ўйин услубидан воз кечиши учун асос бўла олмайди.

"Барселона" ўзининг футболини намойиш этганидан жуда хурсандман. Баъзи бир вазиятларда тўп дарвозага киргиси келмади, лекин бу футбол, бунда ҳамма вақт ҳам ғалаба қозониб бўлмайди. Ҳа, бу биз учун шок, лекин футбол шунақа нарса. Мен "Челси"ни табриклайман, улар мисли кўрилмаган ишни амалга оширишди. Асосийси, жамоамиз биз учун омадсиз бўлган ҳафтада муносиб туриб берди ва ўз футболини намойиш этди. Мен футболчиларимиз ва мураббийимиздан фахрланаман. Бугун "Челси"нинг режаси иш берди, лекин биз барибир ўз футболимизни ўйнашда давом этамиз ва ўйин услубимиздан воз кечмаймиз. Мухлисларимизга алоҳида раҳмат айтаман, улар билан фахрланаман. Улар доим жамоани қўллаб-қувватлашади, ютқазамизми, ютамизми, уларга бунинг фарқи йўқ", — деди Росель.