17 май куни Испанияда Ўзбекистон футзал терма жамоаси иштирокида навбатдаги ўртоқлик учрашуви бўлиб ўтди. Хориж йиғини давомидаги тўртинчи ўртоқлик учрашувида Хосе Мария Мендез шогирдлари Испания олий дивизиони вакили «Пуэртоллано» клубига қарши майдонга тушишди.
 
Жами тўққизта гол урилган қизиқарли учрашувда 6:3 ҳисобида Испания клуби вакиллари ғалаба қозонишди. Шундай қилиб, Испания клубларига қарши тўртта учрашувда Ўзбекистон футзал терма жамоаси фақат бир марта ғалаба қозонди. Қолган барча учрашувларда маҳаллий жамоалар ғолиб чиқишди.
 
Қайд этиш жоиз, «Пуэртоллано» клубига қарши ўйинда Дилшод Ирсалиев дублга эришди. Терма жамоанинг яна бир голи Умид Холматов ҳисобига ёзилди.
 
Дастлабки режага кўра, терма жамоа Испаниядаги йиғин давомида тўртта ўртоқлик учрашуви ўтказиши керак эди. Бироқ Хосе Мария Мендез шогирдлари бугун, 18 май куни ҳам яна бир назорат баҳсида майдонга тушишади.
 
Эслатиб ўтамиз, Ўзбекистон футзал терма жамоаси 22 майга қадар Испанияда ўқув-машғулот йиғинларини олиб боради. Шундан сўнг жамоа, 25 май – 2 июнь кунлари БААда бўлиб ўтадиган Осиё чемпионатида иштирок этиш учун, Мадриддан Дубайга жўнаб кетади.
 
Ўртоқлик учрашуви
17 май, пайшанба
«ПУЭРТОЛЛАНО» (Испания) – ЎЗБЕКИСТОН 6:3
ГОЛЛАР: Дилшод Ирсалиев (2та гол), Умид Холматов.
ЎЗБЕКИСТОН (бошланғич тўртлик): Олег Тукмаков, Нодир Элибоев, Дилшодд Раҳматов, Шуҳрат Тожибоев, Фарҳод Абдумавлонов.