"Пахтакор" Бекободдаги янги бунёд этилган “Металлург” Марказий стадионида ғалабага эришган биринчи жамоа бўлиб тарихда қолди.

14-турдан ўрин олган ўйинда “Металлург” меҳмони бўлган “шерлар” ғалабага эришишди. 

Учрашувни тошкентликлар фаол тарзда бошлашди. 6-дақиқада ярим ҳимоячи Шерзод Каримовнинг йўллаган зарбасига фақатгина дарвоза устунига тўғаноқ бўлди. 10-дақиқада эса ҳисоб очилди. Ҳужумни Шахбоз Эркинов аниқ тарзда якунига етказди – 0:1. 20-дақиқада "Пахтакор"нинг асосий дарвозабони ҳисобланган Темур Жўраев жароҳат олди. Мураббийлар уни мажбурий равишда алмаштиришди. 31-дақиқада Дилмурод Каримов захирадан майдонга тушган Лобановни ожиз қолдирди – 1:1. Биринчи тайм айнан мана шу ҳисоб билан якунига етди.

Иккинчи бўлимда битта гол урилди. 60-дақиқада Шерзод Каримов майдон эгалари дарвозасига иккинчи голни киритди – 1:2. Қолган дақиқаларда “Металлург” вакиллари ҳисобни тенглаштиришга уринишди, бироқ ҳисоб ўзгармади ва Мурод Исмоилов шогирдлари янги стадионда ғалабага эришишди. Учрашув охирида ҳимоячи Даврон Ҳошимов майдондан четлатилди, энди у кейинги турда бўлиб ўтадиган “Бунёдкор”га қарши ўйинни ўтказиб юборади.

«Металлург» (Бекобод) – «Пахтакор» (Тошкент) 1:2 (1:1)
Голлар: Шахбоз Эркинов 10, - 0:1. Дилмурод Каримов 31, - 1:1. Шерзод Каримов 60, - 1:2.
Ҳакамлар: С.Зайлобиддинов (Фарғона), Б.Норсафаров (Қашқадарё вилояти), Т.Гайнуллин (Тошкент), И.Гормашов (Тошкент).
«Металлург: Икромов, Акбаров, Ҳ.Ҳошимов, Вагапов, Аҳмедов, Д.Каримов, Каримқулов, Одилов, Йўлдошев, Калевич, Нурматов.
«Пахтакор»: Жўраев (Лобанов, 21), Суюнов, Кримец, Клецков, Д.Ҳошимов, Исматуллаев, Андреев (Шарофетдинов, 80), Каримов, Қиличев, Махарадзе, Эркинов (Абдухолиқов, 70).
Четлатиш: Даврон Ҳошимов 90+2.
Назоратчи: Ғ.Каримов (Тошкент).