Бугун Ўзбекистон ёшлар терма жамоаси Иордания билан куч синашади. Дастлабки турда вакилларимиз Вьетнамни йирик ҳисобда мағлуб этишган бўлса, Иордания КХДР билан дуранг ўйнади. Кеча рақибимиз  бош мураббийи Жамол Абу Обид Иордания футбол ассоциацияси президенти Али бин ал-Ҳуссайн билан телефон орқали суҳбатда бўлди.

Суҳбат давомида бош мураббий Ўзбекистонга қарши ўйин олдидан жамоанинг тайёргарлиги жойида эканини таъкидлаб, Ассоциация раҳбарини хотиржам қилишга уринди. Ўз навбатида Ал-Ҳуссайн: "Якшанба куни бўлиб ўтган КХДРга қарши дастлабки ўйинда жамоа қийинчилик билан дурангга эришди. Ўзбекистонга қарши ўйинда ғалабага умид қиламиз ва ёш футболчиларга омад тилайман", деди.

Иорданиялик ёшлар ҳам қитъа чемпионатининг ярим финалига етиб бориб, келаси йили Туркияда бўлиб ўтадиган ёшлар ўртасидаги жаҳон чемпионатида иштирок этишни мақсад қилишган.

"Ёдингизда бўлса, Иордания ёшлар терма жамоаси 2006 йили Ҳиндистонда бўлиб ўтган қитъа чемпионатининг чорак финалида Хитойни мағлуб этиб, 2007 йили Канададаги жаҳон чемпионатида илк маротаба қатнашганди. Ҳозирги жамоада ҳам ўша натижани такрорлаш учун яхши имконият  бор", дейди Иордания футбол ассоциацияси президенти.

Али бин Ал-Ҳуссайн сўзининг якунида Иордания халқидан ёшлар терма жамоасини қўллаб-қувватлашга чақирди: "Иордания халқининг қўллаб-қувватлаши ва мухлисларнинг стадионга ташриф буюриши футболчиларнинг руҳини кўтаради ҳамда муҳим вазифани амалга оширишда уларга ёрдам беради, деган умиддаман".