ЖЧ-2014 саралаши доирасидаги навбатдаги ўйинларга тайёргарлик кўраётган Эрон терма жамоаси ўртоқлик учрашувида Тожикистон терма жамоаси 6:1 ҳисобида мағлубиятга учратди.

ЖЧ-2014 саралаш 4-босқич 6-тур ўйинлари доирасида 14 ноябрь куни бўлиб ўтадиган Ўзбекистон терма жамоасига қарши ўйинга тайёргарлик кўриш мақсадида, Эрон терма жамоаси 6 ноябрь куни Теҳрондаги «Озоди» стадионида Тожикистон терма жамоасини қабул қилди.

Тўлиқ майдон эгалари ташаббуси остида кечган ўйин Карлуш Кейруш шогирдларининг 6:1 ҳисобидаги йирик ғалабаси билан якунига етди. Эрон терма жамоасининг голлари Абулқосим Деҳнавий (2та), Ёқуб Каримий (2та), шунингдек, захирадан майдонга тушган Аҳмад Ҳасанзода ва Алиризо Аббосфард ҳисобига ёзилди.

«Шогирдларим кўрсатган ўйиндан қониқиш ҳосил қилдим. Захира таркиби футболчиларида ўйин амалиёти учун имконияти пайдо бўлгани жуда ҳам яхши. Ўзбекистон терма жамоасига қарши ўйин эса оғир бўлади, деб ўйлайман», - деди Эрон терма жамоаси бош мураббийи, португалиялик мутахассис Карлуш Кейруш.

ЖЧ-2014 саралаш 4-босқич 6-тур учрашувлари арафасида «А» саралаш гуруҳида Жанубий Корея ва Эрон терма жамоалари 7 очко билан пешқадамлик қилаётган бўлса, 3-ўриндаги Ўзбекистон терма жамоаси ҳисобида 5 очко бор. Қайд этиш жоиз, Ўзбекистон ва Эрон терма жамоалари ўртасидаги Тошкентда бўлиб ўтган дастлаби ўйинда эронлик футболчилар 1:0 ҳисобида ғалаба қозонишга муваффақ бўлишган.

Халқаро ўртоқлик учрашуви
6 ноябрь, сешанба
ЭРОН – ТОЖИКИСТОН 6:1 (4:0)
ГОЛЛАР: Қосим Деҳнавий (9, 32), Ёқуб Каримий (13, 33), Аҳмад Ҳасанзода (50), Алиризо Аббосфард (89) – Соҳиб Саванқулов (68).
ЭРОН: Раҳмон Аҳмадий, Ёқуб Каримий, Эҳсон Ҳожисафий, Умид Назарий, Али Каримий, Ҳусайн Моҳиний, Милод Нурий, Шуъжо Халилзода, Абулқосим Деҳнавий, Саид Жалол Рафқаий, Муҳаммад Нусратий.
Захирадагилар: Меҳди Раҳматий, Жалол Ҳусайний, Жавод Некунам, Муҳаммад Нурий, Муҳаммадризо Халатбарий, Карим Ансарифард, Алиризо Аббосфард, Пежман Мунтазарий, Пежман Нурий, Араш Афшин, Соша Мақомий, Аҳмад Ҳасанзода.