Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида кеча 12-тур баҳслари ўтказилди.
Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов бу турда ҳиндистонлик Видит Сантош Гужратҳига қарши қора доналарда ўйнади.
Мазкур баҳсда ҳамюртимизни дуранг натижа ҳам қаноатлантирарди. Аммо Нодирбек ўйин бошиданоқ ғалаба учун ҳаракат қилди ҳамда 11-юришда таваккал қилиб Филни олдинга сурди (c4 хонасига). Компьютер мазкур юришни ноаниқ юриш сифатида баҳолади ва Видит кичик устунликни қўлга киритди.
Ҳиндистонлик шахматчи кетма-кет аниқ юришлар орқали ўйин охиригача мазкур устунликни сақлаб қолди. Эндшпилда Гужратҳи бир Пиёда устунлигига эга бўлди. Бунинг оқибатида Нодирбек 75-юришга келиб мағлубиятни тан олди.
12-турдан кейин бирданига 5 нафар шахматчида 7,5 очко мавжуд. Абдусатторов қўшимча кўрсаткич бўйича 4-ўринга тушиб қолди. Ватандошимиз бугун сўнгги турда германиялик Александр Донченкога қарши оқ доналарда ўйнайди. Ўйинлар Тошкент вақти билан 16:15да бошланади.
