19 апрель куни "Пахтакор" олтинчи турнинг марказий баҳсида "Локомотив"ни қабул қилади. Мазкур ўйин бу икки жамоа ўзаро беллашувлар тарихидаги энг муҳим учрашувга айланади дейиш мумкин. Чунки "темирйўлчилар" турнир жадвалида биринчи ўринни эгаллаб туришибди. Жамоамиз рақибни мағлуб этган тақдирда Ҳаким Фузайлов шогирдларини йўқотилган очколар бўйича қувиб ўтиш имконияти юзага келади. Жамоалар таркибида жароҳат сабабли йўқотишлар ҳозирча маълум қилинмаган. Лекин ўтган турда рақиб сафида Санжар Турсунов ўйин қайдномасига киритилмаган.

Ҳозиргача олий лигада жамоалар 16 бор тўқнаш келишган. Уларнинг 12тасида "Пахтакор" ғалаба қозонган, 4 баҳс дуранг билан якунланган. Рақиб эса "шерлар"ни доғда қолдира олмаган. Ушбу ёқимли анъанани Мурод Исмоилов шогирдлари давом эттиришади деган умиддамиз. "Пахтакор" 44, "Локомотив" 11 бор ўзаро учрашувларда тўп киритган. Жамоамиз мезбонлик қилган баҳсларда меҳмонлар фақат бир очкони қўлга киритишган. Ўтган мавсумда сафарда 1:1 ҳисоби қайд этилган, ўз майдонимизда 2:1 ҳисобида зафар қучгандик.

Ёшлар таркиблари ўйини 18 апрель куни Қибрайда соат 16:00да бошланади. Асосий жамоалар учрашуви 19 апрель, жума куни "Пахтакор" Марказий стадионида соат 17:30да бошланади. Ўйинга чипталарни мухлислар 3000 сўмдан харид қилишлари мумкин.

«Пахтакор» (Тошкент) – «Локомотив» (Тошкент)
Ҳакамлар: Равшан Эрматов (Тошкент), Абдулҳамид Расулов (Тошкент), Жаҳонгир Саидов (Тошкент), Зокир Қодиров (Навоий).
Назоратчи: Алишер Абдуллаев (Тошкент).