37 ёшли ҳужумчи Анхель Ди Мария “Росарио Сентраль” жамоасига қайтди. Бу ҳақда клуб матбуот хизмати ижтимоий тармоқдаги Х (собиқ Twitter) саҳифасида маълум қилди.

«Биз учун умумий тарихимизга ёзилиши керак бўлган яна кўп саҳифалар бор», — дейилади “Росарио Сентраль” аккаунтида.

Ди Мария Аргентинанинг мазкур клуби академиясининг тарбияланувчиси ҳисобланади. У 2006 йилдан 2007 йилгача “Росарио Сентраль”нинг катталар жамоасида тўп сурган. Шу давр мобайнида у барча мусобақаларда 39 та ўйинда қатнашиб, 6 та гол ва 2 та голли узатма билан ажралиб турган.

Клубга қайтишидан олдин 37 ёшли ҳужумчи Португалиянинг “Бенфика” жамоасида ўйнади.